Cap. IX.
Auff was manier man die Kling engagiren sol.
Vor allen dingen ist wohl zu mercken / wan man dem Feinde seine schwäche gewinnen will / daβ mans mit seiner stärcke auff des Feindes schwäche mit grosser behutsamkeit thue / dan man muβ dem Feind die Kling nicht zu hart stringiren, auff daβ man sich nicht selber zuviel entblösse / und dem Feind dardurch gelegenheit gebe / so wohl in so vorfallender blösse zu caviren als auch zuzustossen / wie droben schon in Cap. V. gemeldet worden.
Cap. X.
Von der einfachen cavationen, und darein zu stossen / und zwar der erste stoβ in die quart.
So man sich mit dem Feind zugleich in der auβwendigen Tertz befindet / muβ man / wan der Feind die Kling engagiren will / fort rucken / die erste motion die er thun wird / wohl observiren, in deme Er die Kling zu gewinnen vermeint / so bald suchen ihme solche zu entfüren / durch caviren, und ihme die quart inwendig stossen / wie die Figur Num. XV. zeiget und so bald der stoβ geschehen / die mensur brechen und sich in vorige postur bringen / daβ man dem Feind desto besser wieder begegnen kan.
