ICh sprach / gleubt mir ohn allen spot /
Lest mich leben der liebe Gott /
So fahr ich Morgen gwis hinein /
Kompt nur her vnd kert bey mir ein.
IM Namen Gotts / ich lass geschehn /
Ich wil mit euch jetzt hinein gehn.
Seit mir willkommen in mein Haus /
Leget nur ab / vnd thut euch aus.
Man sol euch ein Handwasser gebn /
Auch ein biszlein essen da nebn.
Ey mein Herr Wirt / spart ir die müh /
Ich danck / das ich hab Herberg hie.
Esst ihr frey und last euch nicht grawn /
Ihr mügt euch heint mir gantz vertrawn.
Morgen wöllen wir weiter redn /
Von den Fechtern vnd ihrn geberdn.
Ja wils Gott / Morgen wil ich bald /
Berichten recht / doch in einfalt.
Ein guten Morgan mein Herr Wirth /
Ihr habt mich recht wol angefürth /
Ich hab geruhrt mechtig wol /
Jtzt sag ich euch was ich nur sol.
Ja / Jung Gesel ich hör es gern /
Was ihr mir sagt / ich möchts wol lern.