Ain anders
Ist er nider mit den henden, vnd wil auff faren, so streich durch, vnd stoß yn czv der prust auf die ander seitten daß ist durch gewechselt
Ain anders
Wandu durch streichst, so fall ym mit der langen schneidt auf sein schwerdt, und windt auf dein lincke seitten das dein daum vnden kumpt, vnd var ym mit der langen schneidt mit der sterck an sein rechte seitten deß halß, vnd spring mit dem rechten fuß vnd ruck yn mit deim scwerdt dar vber
Ain anders
Wan du auß dem streichen durch wechselst, und kumbst zv der anderen seitten oben auff sein schwerdt, so magstu die stuck gleich als wol treiben als vor mit czeckruren, vñ mit allen dingen alß vor auff allen seiten
Fechten auß dem abseczen
Wan du mit ainem fichst, vnd nahendt czu ym kumst, so kum in den phflug, vnd treib den behendlich mit wenden von ainer seiten czu der andren, vnd daß dein ort alweg vor dir pleib, auß dem magstu treiben daß verseczen, daß ist die nech, vnd yn dem magstu stercken mit der langen schneidt, vnd dar auß treiben alle vor geende stuch, auch magstu hew vnd stich abseczen vnd die flechlichen prechen, vnd mit dem ort die pleß suchen
