Wie ein Zwerghaw mit dem Dolchen abzuwenden.
Figur 26.
JN dieser Figur siehet man wie ein Zwergstreich gegen dem Gesicht abzuwenden, leget euch in die Huth der ersten Lection mit erhabenem vnd steiffem Dolchen, vnd so jhr den Zwergstreich sehet kommen, versetzet mit der Schneiden des Dolchens, vnd gebet jhm mit versetzung des rechten Fuß einen Stoß gegen der entbloͤsten Seiten, allda jhr ohne zweiffel den effect vorgestelter Figur befinden werdet.
Mercket das diese sechs Figuren alle einerley Art seynd: man muß aber in einer Zeit versetzen vnd schlagen, vnnd so jhr euch nur umb ein geringes zwischen dem versetzen vnnd schlagen auffhaltet, werdet jhr nichts außrichten. Must euch derhalben fleissig vben daß jhr es hurtig verrichten koͤnnet, vnd euch auch also baldt ausser dem Maß zuruck begeben.
Jhr must auch in acht nehmen, daß diese sechs Lectionen die fuͤrnembsten vnd besten seynd in der Fechtkunst: man muß sie aber wol lernen verrichten. Sonderlich aber, daß man den Dolchen fest halte, vnd wann man den Streich sihet kommen, mit demselbigen versetze, vnd gleich mit dem Rapier zustosse nach dem Ort den man entbloͤsset befindet.
