Wie der Stich gegen der Brust mit Rapier vnnd Dolchen zu wenden.
Figur 27.
DAs fuͤrnembste so an einem der Lust hat zur Vbung der Waffen erfordert wirdt, ist daß er wisse auff Gegenth. anzusetzen, auff jhn zustoßen, vnnd sich widerumb ausser dem Maß zuruck zu begeben. Solches aber zuverrichten muß man der Gegenhuth gute Wissenschaft haben, vnnd im stossen gegen dem entbloͤsten Ort geschwind sein: vnnd wann man jhn ein wenig entbloͤst sihet, muß man allgemach mit gesencktem Rapier an jhn setzen, vnnd die Spitze gegen seiner Brust halten, den Dolchen aber auff die Huth seines Rapiers richten, vnnd wann jhr also ins Maß kompt, solt jhr erstlich mit dem Rapier, darnach mit dem Leib, vnnd endlich mit dem Fuß fortsetzen, allda jhr den effect dieser Figur befinden werdet, vnnd ihn in die Brust treffen ehe er es gewahr wirdt. Hergegen aber, wann jhr erstlich mit dem Leib fortsetzet, vnnd hernach den Stoß woltet thun, wuͤrdet jhr nichts außrichten: dann es wuͤrde Gegentheil ewer gewahr, vnnd nicht vnderlassen zuversetzen, auch im gegenstossen nicht saͤumich sein: da jhr dann nicht ohne Gefahr weret. Darnach so baldt jhr den Stoß gethan, solt jhr euch ausser dem Maß begeben, vnnd mit fertigen Waffen zum versetzen vnnd schlagen, in die Huth legen. Dann so Gegentheil befindet daß er getroffen, wirdt er mit gewalt, sich zu raͤchen mit hawen vnnd stechen an euch setzen, welchen jhr versetzen vnnd gleich mit die Spitze bieten solt, wie jhr in vorigen Figuren angewiesen. Die fuͤrnembste Jmportanz aber dieser Figur bestehet darin, daß man sich nach gegebenem Stoß ausser dem Maß wisse zu thun. Vnd damit solches ohne Gefahr geschehe muß man erstlich, wie gemelde:, den Kopff vnnd darnach den Leib zuruck ziehen. Dann so
