Page:Escrime Novvelle ou Theatre (Nicoletto Giganti) Book 1 1619.pdf/82

Eine kuͤnstliche Huth mit entbloͤsung der lincken Seiten.

Figur 30.

DIe kuͤnstliche Huthen seynd beinahe vnzehlbar; doch will ich derselbigen drey in diesem Buch vorstellen, dabey die verstendigen gnugsamen bericht werden finden, daß sie mancherley Art als sie begehren, koͤnnen zu wegen bringen.

Die rechte Weise sich in eine kuͤnstliche Huth zu legen ist, daß man einen Ort deß Leibs entdecket, doch also daß alle die andere bedeckt bleiben, vnd Gegenth. nicht mehr als an demselbigen koͤnne zu kommen, wie in gegenwertiger Figur zu sehen, darin die gantze lincke Seite bloß stehet, vnd kan doch Gegenth. nicht ohne Gefahr darzu kommen. Da so er darnach hawet oder stoͤst so koͤnt jhr versetzen vnnd gleich mit stossen, mit fortsetzung des Fusses auff der Seiten des Rapiers. Nach gegebenem Stoß weichet jhr widerumb nach vorgemeldter Lehr auß dem Maß.

Diese kuͤnstliche Huthen seynd fuer die Liebhaber dieser Kunst, welche sich auff die Zeit vnd das Maß verstehen, vnd sich die Vbung nicht verdriesen lassen, vnd hat man sich derselbigen allerhand Faͤllen zugebrauchen, vnd sonderlich kan man in gegenwertiger Occurrentz, an Gegentheil setzen, vnnd wann man ins Maß kommen, kan man da er an sich hielte, jn an dem entbloͤsten Ort treffen: oder da er stiesse koͤnt jhr viel andere Ding verrichten: als versetzen vnd schlagen mit einander, oder versetzen mit einer ficta oder mit einem Trit, oder auch alles was man in einer andern geuͤbten Huth zu thun pfleget, vnnd so der Feind auß seyner Huth etwas vnvorsichtig herfuͤr stoͤst, habt jhr gelegenheit beydes zu versetzen, vnnd gleich mit in einer Zeit zustoßen, vnnd euch auch ohne Gefahr zuruck zu begeben, vnd werden zum offtermahl durch diese Huth nicht allein die Schuͤler, sondern auch wol die beste