Eine kuͤnstliche Huth mit entdeckung der Brust.
Figur 32.
DIeses ist auch eine Huth in welcher zwar die Brust entbloͤßt, da aber der Gegentheil keinen Schaden weder auff der Seiten des Rapiers noch auff des Dolchens Seiten thun kan. Dann will er stossen so muß er solches gegen der entbloͤsten Brust thun: in dem er aber stoͤst, solt jhr versetzen vnnd gleich in einer Zeit schlagen, entweder nach der rechten Schulter, oder nach dem Gesicht welche euch am nehesten seynd. Jhr koͤnt in solcher Huth auch vnderschiedliche Ficten gebrauchen, vnd fortschreiten, beneben allem dem das jhr in anderen Huthen gelernet habt. Sie ist auch gut zu brauchen wider die, so strack zustossen vnd sich keiner Ficten befleissen. Wider die aber so sich auff die Zeit vnnd Maß verstehen, auch wol einen stracken Stoß, oder eine Fictam fuͤhren koͤnnen, muß man sich jhrer nit merken laßen: dann wider solche ist es besser, man halte sich in den Waffen bedeckt, vnd vnderstehet euch des Gegentheils Rapier mit ewerem zu bedecken ausser dem Maß, auff das jhr nach vorfallender gelegenheit ohne Gefahr versetzen vnnd schlagen koͤnt.
