Eine ficta in Rapier vnd Dolchen damit man vber den Dolchen herstoͤst.
Figur 33.
GLeich wie obseruation der Zeit vnnd des Maßes das fuͤrnembste Stueck in der Fechtkunst ist, also seynd auch die Wendungen vnd Ficten die Zierte derselbiger. Die Wendung bestehet in der drehung der Faust: die ficta aber darin daß man sich eines lest vermerken, vnd thut doch ein anders, vnd kan kan keine ficta ohne Wendung geschehen.
Nun wendet man entweder vnder oder vber dem Gefaeß des Rapiers, oder auch der Spitzen des Dolchens außwartz oder inwatz.
Jch kan auch nicht von der ficta handeln es werde dann auch die Wendung darvnter begriffen. Es ist aber die ficta ein schaͤdlicher betrug, fuer welchem sich auch die aller beste Fechter nicht allezeit zum besten koͤnnen vorsehen, viel weniger aber die so nicht sehr wol erfahren seind, vnd geschihet auff nachfolgende Weise. Wann man dem Gegentheil einen Stoß auff die Brust, oder ins Gesicht will geben, muß man allgemach mit gesenktem Rapier, vnder dem Dolchen an jhn setzen, vnd den Dolchen gegen der Huth des Rapiers halten: vnnd wann jhr ins Maß kommen so stost resolut zu, vnnd gebet euch also bald wider zuruck. So jhr jhn getroffen, habt jr nichts weiters zuthun: versetzet er aber, so setzet jhr auff ein newes an, vnd wann jhr im Maß, so bietet jhm die Spitze ohne erlengerung des Schrits, mit fest stehendem Leib vnd gesenktem Dolchen: vnd indem er will mit versenktem Dolchen versetzen, solt jhr die Spitze ewers Rapiers erheben, die Faust drehen, den Schritt mehren, vnd also jhm nach der Brust vnnd dem Gesicht stossen: welches jhr vnvermerkt vnnd ohne Gefahr thun werdet, wie in der Figur zusehen. Vnd dz diese ficta jren effect erreiche, wirdt eine grosse Geschwindigkeit darzu erfordert, damit man nit erkennen koͤnne ob man resolut oder mit einer ficta stossen woͤlle, vnnd solt in acht nehmen, daß wann jhr ewer Rapier vber Gegentheils Dol
