chen woͤlt bringen, solches in einer Wendung geschehe, da wenden vnd stossen mit einander in einer Zeit gehe. Darnach weichet widerumb ausser dem Maß wie droben vermeldet, vnd verwahret euch fuͤr Gegentheils Rapier.
Eine ficta im Rapier vnd Dolchen nach der Brust zustossen.
Figur 34.
ZWischen dieser vnd der vorigen ficta ist kein vnderscheid, als daß jehne vber den Dolchen diese aber vnder dem Dolchen geschihet: wird auch mit denselbigen Regulen zu wegen gebracht. Hie solt jr das Rapier hoch halten, vnd wann jhr ins Maß kommen, dem Gegenth. einen Stoß vber den Dolchen bieten, da jhr den Arm etwas hoͤher haltet als die Spitze des Rapiers: welchen Stich man den Dolchenschinder nennet. Wann er nicht versetzet, so geht ewer Stoß an, vnd habt nichts weiters zuthun. Versetzet er aber, so solt jhr jhm die Spitze widerumb wie zuvor bieten, vnd euch im Schrit, vnd auff festem Fuß halten: vnnd in dem er will versetzen, solt jhr die Faust mit dem Rapier drehen, daß die Spitze vnder des Dolchens Gefaͤß komme, vnd also mit erlangtem Schrit fortstossen, so trefft jhn jhr in die Brust ehe er es gewahr wirdt. Darnach weichet auß dem Maß, vnd verwahret euch fuͤr Gegentheils Rapier wie droben.
