Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/120

From Wiktenauer
Jump to navigation Jump to search
This page needs to be proofread.

Wann du jhm Hauwest Krump zůr sterck /
Durchwendt / Vberlauff damit merck.

Wann du einem ein Krumphauw zůhauwest / vñd er hart widerhalt / also das du jhn mit vberschrencken oder anderer arbeit Oben nichts haben magst / so wend mit dem knopff vnden durch / vnd greiff mit demselben jm auff der andern seiten aussen vber sein klingen oder Arm / vnnd reiss vndersich / schlag jhn mit Langer schneid im riss auff sein Kopff / oder greiff mit dem knopff zwischen sein beide hend / wie in der Figur hievor getruckt an den zwen bossen gegen der Lincken hand zů sehen.

Bruch.

Hauwet einer ein Vnderhauw auff dich / so Hauw mit Langer schneid / das du dein hendt krum oder kreutzweiß habest / oben auff die sterck seiner klingen / in dem es dan gliitzt so schieb die kling gerichts fúr dir hin / vnnd im fúrtscheiben so winde die kurtze schneid in einem schnall vmb zů seinem gesicht oder auff sein Kopff / fehret er auff vnd wehrt dir dein schnall / so fahr auch auff / vnnd zůck vmb dein Kopff / vnd schlag jhm zů seiner vndern Blóß.

Des Knopffs verfúhrens solt gedencken /
Mit Zeckrur / Schnellen würst jhn krenken.

Ist souil / wenn du in einem Krumphauw einhauwest zů seiner Rechte / vnd er widerhelt oder versetzt hoch / so windt mit dem knopff vnden durch / vnd stelle dich mit geberden als wolstu wie vor gelehrt / mit dem knopff vbergreiffen / ehe vnd denn er sich solches versicht / so Schnell jhm die kurtze schneide daselbst wider hinein / zů welcher seiten du erst den Krumphauw gethan hast.

Item greiff im zůfechten dein gegenmann mit einem gewaltigen vberzwerch Mittelhauw / starck zům Lincken ohr an / zůck behend dein knopff vmb dein Kopff / vnd trauw jhm damit / als ob du jhm mit dem Knopff zůr andern seiten stossen wolst / vnd in dem er dir hie entgegen wischt den stoß zůuersetzen / so schnell jhn mit der kurtzen schneid wider zů seinem Lincken ohr / vnd im schnall trit mit deinem Lincken fůß zů ruck hinder dein Rechten / vnd Hauwe dich von jhm.