Das erste Stuck, in disem wirt gelehret, wie du ihn mit gleichem hauw aus dem Stier uberlangen solt mit einem angehenckten Mittelhauw, sampt einem stoß, und einem creützhauw nach.
WAnn du im zufechten in die Hut des Stiers kommest, und dein widerpart Hauwet dir zu von seiner Rechten, es sey von Unden oder Oben, so spring wol auß seinem streich gegen seiner Lincken seitten, und Hauw mit ihm zugleich, doch das du mit deiner Wehr uberhalb der seinen bleibest zu seinem gesicht, und gegen seiner hand, darinnen er sein Wehr führet, mit außgestrecktem Arm gantz durch, also starck, das dein Dusack wider uber deinem Haupt umschiesse in den Sturtz, das ist in Lincken Stier, von dannen Hauw ein Mittelschlag mit außwendiger Fleche gegen seiner Rechten, wider gegen seinem gesicht durch, das dein Dusack abermal uber deinem Kopff umbschiesse in rechten Stier, dise zwen häuw sollen behend unnd starck auff einander gehen, Demnach trawe von dannen einen stoß, auff halbem wege aber zuck den stoß wider, unnd hauwe zwen streich durch das kreutz, nach.
Das ander stuck, in welchem gelehret würt, wie du, in dem er auffgehet, durch sein Arm solt Hauwen, und in dem er wider herab Hauwet, du ihm zugleich oberhalb seinem Wehr zum Kopff hauwen solt.
WAn du im zufechten in dise Hut kommest, so hab acht, Als bald er im hauwen ist, so hauwe ihm uberzwerch, oder von unden (in dem er auffzeucht zum streich) von deiner Rechten, gegen seiner hand durch, Demnach hauw auch behend, in dem er wider herhauwet, mit gewaltigem außtretten gegen seiner Rechten, auß seinem streich, aussen uber seinem rechten Arm zu seinem Kopff.
