Wiktenauer logo.png

Difference between revisions of "Page:Gründtliche Beschreibung der Kunst des Fechtens (Joachim Meÿer) 1570.pdf/257"

From Wiktenauer
Jump to navigation Jump to search
 
Page statusPage status
-
Proofread
+
Not proofread

Revision as of 15:47, 27 May 2021

This page needs to be proofread.

Oberhůt sampt den Ochssen.

DIe Oberhůt wird zů den seiten auff zweyerley weiß angesehen vnd gemacht / nemlich ein mal zům stich / das ander mal zům Hauw / zů deren schick dich also. Standt mit dem rechten Fůß vor / halt dein gefeß neben deiner Rechten hoch fúrsich vbersich zůr seiten ausgestreckt / aller dings wie das grosser Bild in der Figur B. zůr rechten außweiset / also das dein vorderer ort das ist die spitz gegen des Mans gesicht stande / das wirt also der Ochß / darumb das du mit deinem Wehr in solchem Leger ein stich von Oben trauwest / genandt / dann der Ochß ist an jhme selber nichts anders dann ein stich von Oben / wann du nun die Wehr mit deinem gefäß (also wie gelehrt) mit vbersich zůr seiten außgestrecktem Arm behaltest / vnnd aber die kling nicht fürsich gegen dem Mann / sonder von dem Mann hinder die auffstreckst / so heißt diß die Oberhůt zům streich / wie das ander die Oberhůt zům stich.

Oberhůt zůr Lincken.

STandt mit dem rechten Fůß wie nechst vor / halt dein Wehr mit dem gefäß hoch neben deiner Lincken / mit obersich außgestrecktem arm / also das die spitz abermals dem Mann gegen seiner Rechten inn sein gesicht stande / so stehestu recht in der Oberhůt des Ochsen zůr Lincken. Behaltestu aber dein gefáß also neben deiner lincken vbersich, vnnd fúrsich außgestrecktem arm / so stehestu abermal in der Oberhůt zům streich / neben deiner Lincken gleich wie vor zůr Rechten / Auch wirt die Oberhůt gerad vor deinem gesicht / mit vbersich vnd fúrsich außgestrecktem Arm / das die spitz auch vbersich fúrsich ausstand volnbracht / doch zů keinem stich sonder nur zům hauw / wiewol derselbige auch in ein stich verwandlet werden kan / Also hastu die Oberhůt zůr Rechten vnd Lincken / zům stich vnnd streich / deßgleichen auch gerad vor dir vbersich auß.