Wie man nach den vier Blóssen fechten sol.
Cap. 10.
DIeweil nun bißher günstiger Leser / alle zům Schwerdt Fechten dienstlich stuck meines erachtens dermassen erklert / also das ein jeglicher dem ernst sein wirt / solches neben fleissiger úbung zů erwegen / gnugsame anleitung alle nach gesetzte stuck zůuerstehn haben wirt / derhalben will ich nun ferner ein Leger nach dem andern / wie man sich darinen verhalten vnd au deren einem jeden Fechten sol / anzeigen / Zůuor aber dieweil alle deine Hauw vnd stuck / auff oder gegen die vier theil des Manns gericht werden sollen / hergegen du auch derselbigen von gemelten vier theilen gewertig sein must / ist derhalben nötig zům eingang des Fechtens auß den Legern / das ich von disem stuck eigentlichen bericht / welches ich durch folgende Exempel dargeben vnd setzen will / vnd erstlich:
Im zůfechten wann du kloffters nehe zům Mañ kommest / so streiche von deiner Rechten vor jhm auff / durch sein gesicht ein mal zwey drey / also das du im driten auffstreichen vor jm (doch das du mit deinm Linkcen fůß vor bleibest) in das Lang ort kommest / von dannen laß das vordertheil deiner klingen gegen deiner Lincken ablauffen / vnnd in dem dein klingen eben im vndersich sincekn ist / so ziehe vnder des dein hefft übersich / trit vnd hauwe den ersten von deiner Rechten gegen seinem Lincken ohr / als bald solcher Hauw antroffen / so bald zůck in einem flug wider ab / vnd hauwe den andern von Vnden vberecke gegen seinem Rechten arm / zů solchem hauw aber bleib mit deinem kreutz hoch vber deinem Kopff / vnd trit mit deinem Lincken fůß zůgleich mit solchem Vnderhauw / ein wenig gegen seiner Rechten zůr seiten aus zů jhm / vnd so dieser auch antroffen / soltu behendt dein Schwerdt wider vbersich rucken gegen deiner Rechten / vnd also von deiner Rechten zů seiner Lincken vndern Blósse hauwen / ehe das recht gerúrt oder
