Wiktenauer logo.png

Difference between revisions of "Page:Gründtliche Beschreibung der Kunst des Fechtens (Joachim Meÿer) 1570.pdf/100"

From Wiktenauer
Jump to navigation Jump to search
(No difference)

Revision as of 01:35, 6 February 2015

This page has been proofread, but needs to be validated.

Eisenport.

DIse Eiseneport ist eigentlich (wie oben gemelt) die Schranckhůt / aus welcher ficht also / Hauwet einer auff dich von Oben / so fahre also mit gekreutzigten henden auff / vnd fang jhm sein hauw auff di sterck deiner klingen / in dem er als dann sein Schwerdt von gemeltem Hauw von deiner klingen wider abnimpt / so hauwe jhm (dieweil er die Arm vbersich zeuhet) mit Vnderháuwen gewaltiglich nach seinen Armen zů / so bald er herab fellet so ficht jhm zům Kopff.

Item versetze seinen Oberhauw wie vor / vnnd in dem die Schwerdter auff einander glützen / so winde behendiglichen die kurtze schneid einwerts zů seinem Rechten ohr / vnnd winde demnach behende wider mit deinem knopff vnden durch / gegen seiner Lincken seiten vbersich / vnd hauwe mit einem abtrit lang gegen seiner Lincken zům Kopff. Wo er dir aber von Vnden Fechten wúrde / so fall mit Langer schneid oben auff sein Schwerdt in das Lang ort / Diese Eisenport oder Schranckhůt brich auß dem Schlüssel / nemlich stich jhm gegen seinem gesicht damit zwingestu jhn vbersich / als dann ficht jhm von Vnden (in dem er vbersich fehrt) nach.

Nebenhůt.

AUß dieser Nebenhůt soltu fúrnemlich die Krumpháuw Fechten / als hauwet dir einer der Blós zů / wann du in der rechten Nebenhůt dich verhaltest / so trit sprungs weiß mit deinem rechten Fus wol aus seinem hauw gegen seiner Lincken / vnd hauwe mit verschrenckten henden oberhalb hinder seiner klingen zům Kopff / zůck behend (wo du gegen deiner Lincken nicht ausreissen wilt) mit geschrenckten henden vbersich / vnd schlag mit der auswendigen flech starck vmb / von Vnden zů seinem Lincken ohr / wo er aber nicht hauwen wolt / so ficht auff solche weiß wie du in der Mittelhůt folgends gelert wirst.