Page:Gründtliche Beschreibung der Kunst des Fechtens (Joachim Meÿer) 1570.pdf/121

Auch so du recht durchschiessen wilt,
Krump, Kurtz, Durchwechsel an sein Schilt.

Diß ist ein recht artig Meister stücklein, wenn du im zufechten bist so schick dich in rechten Zorn, als bald er sein Schwerdt in die lufft bringt, so Hauw ein freyen Oberhauw zu ihm, volführe den aber nit, sonder verschrenck in der lufft deine hend, das die Rechte hand uber die Lincke kom, und Hauw also mit kurtzer schneid Krump gegen seinem Hauw listiglich durch, in dessen trit wol mit einem zwifachen trit auff sein Rechte aus, unnd Hauw mit Langer schneid zu seinem Rechten ohr, oder kom mit dem durchwechseln an sein Schilt gegen seiner Rechten, alda arbeit mit Winden, Schneiden und was dir fur arbeit werden mag.

Ein stuck aus dem durchschiessen.

HAb im zufechten acht, so bald dein gegenfechter sein Schwerdt zum streich auffziehet, so Hauw dieweil behend und listig vor ihm Krump durch (wie oben gemelt) damit du zu seiner Rechten aussen an seinen Schilt komest, und als geschwindt es nur rührt so winde ihm die kurtze schneid einwerts zum Kopff, unnd ruck in solchem winden dein knopff wol ubersich, das die kurtze schneid dest dieffer kom, fehrt er dann auff zu versetzen, so laß dein kling wider umbschnappen das dein Rechte hand wider uber die Lincke kome, und schnell ihm also im umbschnappen wider unden zu seinem Rechten ohr hinein, in solchem aber trit mit dem Lincken fuß wol auß auff sein Rechte, Zwirch dann bald wider mit einem abtrit zu seinem Lincken ohr dieff, unnd wind an seinem Schwerdt dein kurtze schneid wider unden heraus, zu seinem Lincken ohr, demnach Hauwe dich von im, und solches alles soll durch das winden behendiglich volbracht werden.

Merck so er dich mit Krump wolt irren,
Am Schwerdt recht bleib, den krieg thu führen,
Mit Winden, Schnieden und was mehr,
Mit verfliegen laß dich nit zu ferr.