Auß disen versen lernestu wie sich zůuerhalten sey / gegen dem der dir krump an dein Schwerdt bindt / es werden aber hie zů zwey stuck dienstlich vermeldet / nemlich das Bleiben vnd der Krieg / welches sich also halt / Wenn dir einer krump an dein Schwerdt bindet / so zůck nit bald ab / sonder bleib an seinem Schwerdt / zů fülen was dir fúr arbeit hie nótig sein werde / als wenn er abgieng das du Nachreisest / oder so er bleibt du windest / dann Winden Schneiden / Verkeren / Außreissen heist hie der krieg / dardurch jmmer einer dem andern sein stuck bricht / vnnd ein Bruch aus dem andern volget / dann wehret er dir eines so verursacht er dich oder hilfft dir zům andern / vnd kriegen also beide vmb das Vor / auch soltu mercken wenn dir einer mit Krumphauwen zůficht / das du gar nit verfliegen lassest von einer Blóß zůr andern / dann als bald du vom Krumphauw abgehest / so bistu jhm gantz bloß / wo er sich ein wenig weiß darein zůschicken.
Hieraus merck nun ein gůt stuck / Hauwet einer von seiner Rechten ein Krumphauw auff dich so setz jhm den Hauw mit Langer schneid vbersich ab von dir / in dem es gliitzt / so bleib mit dem Bandt an seiner klingen / winde in des dein knopff vbersich gegen deiner Lincken / vnnd die kling vndersich gegen seiner Lincken / die kurtze Schneid an sein Linck ohr / Diß aber alles soll zůgleich in einem trit zůgehn / so triffestu gewiß / ob er aber so gescheid wer vnd auch den Krumphauw in das Langort verwenden wúrde / so winde in einem schnall die kurtze schneid einwerts zů seinem Kopff / winde demnach behend mit dem knopff wider vnden durch auff dein Lincke seiten / greiff also mit dem knopff vber sein kling oder arm vnnd reiss aus / oder so dir das gewendt / so nim andere stuck so du hie am tüglichen ersihest fúr die hand.
Bald schnell die schwech zůr Rechten dar /
Zwifach schnellen / mit Schilt dich bewar.
Merck kom im zůfechten in rechten Wechsel / von dannen streich auff durch sein gesicht / das dein Schwerdt vber dein Haupt vmblauff in einder Rinde / trit mit deinem Lincken wol auff sein Rechte / vnd schlag mit der außwendigen flech von deiner Lincken gegen seiner Rechten / vberzwerch zům ohr / nim den Kopff wol mit / wie hievor gemelt / aber in dem es gliitzt / so stoß behend dein knopff vnder dein Rechten arm durch / vnd schnell jhm also mit
