Von den Laͤgern oder Hutten vnd jhrem gebrauche.
Cap. 2
OB wol dise Laͤger, so im Dusacken gebreuchlich, auß dem Schwerdt jhren vrspung nemmen vnnd haben, Auch denselbigen in betrachtung nicht vngleich angesehen werden: So haben sie doch nach enderung der Wehre einen vnderschiedlichen gebrauch, beyde in den namen, vnd darauß zu Fechten.
Derhalben ich für nottwendig geachtet, solche Laͤger nit weniger, den die hieuor im Schwerdt, der ordnung nach zu setzen, vnd war zu sie insonderheit dienstlich vnd nutzlich moͤgen gebraucht werden, an tag zugeben. Vnd Erstlich so seind der Laͤger fünff: Nemlich die Zorn hut, der Stier, die Mittel hut, der Eber, vnd der Wechsel: welche, wie du sie zur Rechten anschicket, also solstu sie auch zur Lincken ins werck richten. Ferner hastu gerad vor dir von vornen herab, durch die auffrecht scheittel Lin auch fünffe. Nemblich vnd zum Ersten die Wacht, Zum andern den Schnidt, welches ist die versatzung, von oben, das Lang orth, die Bastey auff zweyerley art, im wider aufffahren, hastu das fünffte. Nemblich den Bogen welches ist die andere versatzung von vnden, wie du im Capitel vom Versetzen hoͤren wirdst. Dieweil aber hernach die Laͤger, bey jhren zugeordneten Stucken in Figuren fürgemalet werden. Hat mich für gut angesehen, die meldung von Legeren, wie du dich darein zuschicken, daselbs hin, als da sie am fuͤglichsten neben anschawung der Figuren beschhriben werden, zusparen: Wie denn ein jedes Leger mit seinem sonderen zeichen vermerckt, in nach gesetztem Register zufinden.
Will derhalben nun ferner von derselbigen nutz, vnd warzu sie dienstlich, zu beschreiben fortfahren. Vnd für das erste, ob ich wol nicht will, das du inn den Legeren, auff des Mans angreiffen wartten sollest. Sondern also, bald du den mann ereylen vnd erlangen kanst, ihn mit deinen stucken, deinem vortheil nach angreiffen, vnd dasselbige außfechten solst: So begibt es sich doch vilmalß vñ offt, das du ohn sondern schaden der dir daruber begegnen moͤchte, deine stuck jhm Vor nicht kanst anheben, vil weniger mit nutz außfuͤhren. Derwegen auß notturfft eruolgt, das du dich in fürsichtigkeit, mit zierlichen doch Ernstlichen geberden, In ein solch Leger schickest, in welches er dir ohn seinen schaden vnd nachtheil nicht wol hauwen koͤnne, damit du dich in solchem Leger sicher nach deinem vortheil jn anzugreiffen vmbsehen, oder auff seine Haͤwe zuwarten geschickt seyest. Zum andern seind sie auch darzu dienstlich, das du durch die Leger, alle deine stuck ordenlich abtheilest, damit so offt du dich, in ein Leger verhauwen, oder auch mit vbersich fahren in eins komen werest, bald wissen moͤchst vnd bedacht seiest, was
