Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/159

From Wiktenauer
Jump to navigation Jump to search
This page needs to be proofread.

Die erste Regel, wie du die vier Haͤwe einen jeden durch seine an, gehoͤrige Lini, Erstlich halb, das ist biß ins Lang orth. Zum andern, gantz durch die Lini, Haw in Haw, von einer seitten fuͤhren sollest.

STeh mit deinem Lincken Fusse vor, halt deinen Dusaͤcken im Stier, oder wie das grosser bild gegen der Lincken in hieuor getruckter Figur außweißt, tritt vnnd Hawe also gerad von Oben durch die auffrecht Lini herab, biß auff den Punckten, auff welchen sich die Linien vber einander schliessen, so stehstu mit außgestrecktem arme im Langen orthe, daruon besehe das grosser bild auch zur Lincken in hie nach getruckter Figur, Von dannen laß ferner das vordertheil deines Dusaͤckens gegen deiner Lincken vndersich sincken vnnd ablauffen, vnd zuck zugleich in dem dein vordertheil vndersich sinckt, dein gehultz also mit hangender klingen vbersich, vmb deinen Kopff, zu einem streyche, Vnder deß, dieweil du deinen Dusaͤcken auffzeuchst zu einem andern Hawe, so zeihe zugleich auch deinen hindersten Fuß hernach, biß an den vorderen Rechten, auff das du zu deinem gezuckten Hawe, mit deinem Rechten Fusse wider einen voͤlligen zutrit habest, Hawe also wider wie vor, durch die auffrecht Lini, doch nit Ferner dann biß auff die schliessung der Lini, ins Lang Orth. Von dannen ermahn dich wider ferner zuͤhawen, aber aller dinge wie vor, vnnd solches treib einen Haw drey oder vier fuͤrsich, so vil du nun der Haͤwe fürsich Hawest, also vil Hawe vnnd trit soltu auch wider zu ruck hindersich Hawen wie du aber im vorrigen fürsich Hawen, den hindersten Fuß hernach, biß zu dem vordersten, (auff das du mit dem forderen weitter zutretten koͤnnest) gezogen hast, Also mustu auch, wann du im Hawen hindersich tretten wilt, inn dem du vffzeuchst zum streich mit dem forderen biß zu dem hindersten zu ruck weichen, vnnd wie du vor zu dem streich, mit dem rechten Fuß fuͤrgetretten, also mustu jetz im Hawen mit dem hindersten vnnd Lincken, zu ruck tretten, deßgleichen wie du bißher den Oberhaw, durch die auffrecht Lini, biß auff den Puncten gehawen hast, also vnd auff solche weiß soltu auch die andern Haͤw durch jhre gehoͤrte Lini volbringen.

Nemblich den Zornhaw, durch die Schlime hangende Lini. Den Mittelhaw durch die vberzwerg. Vnd den Vnderhawe durch die vbersich steyget Lini, vnnd das allwegen nicht ferner dann biß inn die mitte dem Puncten gleich, alda laß wider gegen deiner Lincken ablauffen, vnd erhol dich mit vbersich zucken deines gehültz zu einem anderen deßgleichen Haw, dise Haͤw sollen dir darzu deinen, auff das du alle deine Haͤw (ehe dann sie gantz vollbracht) noch also auff halbem weg lernest auff halten, vnd in ein versatzung verwennden, damit du deines gegenparts haͤwe in vollem lauff mit gleichen Haͤwen empfangen koͤnnest.