Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/161

From Wiktenauer
Revision as of 18:44, 15 January 2021 by Michael Chidester (talk | contribs)
Jump to navigation Jump to search
This page has been proofread, but needs to be validated.

Zum andern, soltu obgedachte Linien gantz durch Hawen, Also schick dich mit deim Dusaͤcken zustehen, wie oben gelernet, von dannen Haw durch die auffrecht Lini mit außgestrecktem arm, gantz durch, vnnd wende dein Rechte seitten dem Haw wol nach, gegen deiner Lincken, also das dein Dusaͤcken in solchem Haw, neben deiner Lincken zu ruck für vber lauffe, Jn dem aber dein Dusaͤcken neben deiner Lincken zuruck durchlaufft, so ziehe vnder deß auch zugleich dein gehuͤltz, neben deiner Lincken vbersich vmb den Kopff, biß in die Wacht wider zum streich, so stehstu wie das Bildt zur rechten in hie vorgetruckter Figur so mit dem buchstaben B. verzeichnet anzeigt, zugleich in dem du dein Dusaͤcken also wie gemelt auffzeuchst zum streich, soltu mit dem hindern Fuß hernach rucken, biß zu dem forderen, auff das du wider zu solchem Haw mit dem rechten fordern fuß ein fuͤrtritt habest, aller ding wie nechst gelert. Tritt also dann ferner mit dem rechten Fuß furt, vnd Haw auß der Wacht widerumb geradt von Oben wie vor, gantz durch die auffrecht Lini, das treib auch ein Haw drey oder vier fürsich vnnd hindersich auff das du jhr wol geuͤbt werdest. Wie du nun den Oberhauw durch die auffrecht Lini volbracht, also vnd auff solche weiß, soltu auch die andern drey, gantz durch jhre gehoͤrende Lini Hawen, Damit du aber solliches (dieweil es eim vngeuͤpteu[!] schwer zuthun) dester baß vernemmen moͤgest, will ich dir den Vnderhaw auff was weiß er gantz durch die Linien zu hauwen sey, auch heiher setzen.

Also stand mit dem lincken Fuß vor, halt dein Dusaͤcken in hieuor gemeltem Stier, alß dann dritt vnnd hauwe mit langer Schneid vberzwerchs von Vnnden der auffsteigenden Lini nach, durch sein gesicht, Jnn solchem Haw, verwende dein handt in der lufft, das dein daumen gegen deiner Lincken sehe, vnnd dein Kurtz Schneid in vollendung des Hauws, auff dein lincke Achsel komme, zu dem wendt dein rechte seitten, wie oben auch gemelt, wol dem Haw nach, gegen deiner Lincken, als bald du mit solchem Haw nahet zu der Lincken Achsel ankommen bist, so zucke dein gehiltz behendt wider zu eim anderen streich vbersich vmb dein Kopff, vnnd ruck dein Lincken Fuß hernach biß zu dem Rechten, Alß dann Haw wider mit eim zutritt deines rechten Fuß von deiner Rechten von vnden Schlims vbersich, durch sein gesicht, also das du mit deim Dusaͤcken zu deiner Lincken Achsel kompst, wie vor, von dannen erhol dich wider mit einem andern Hawe, Solches treib dann fürter ein Haw drey oder vier hindersich vnnd fürsich, wie du mit vorigen halben Haͤwen gethon hast. Wie du nun mit den halben Haͤwen hieuor gelehrt bist, deines gegenparts streich auff zufangen, Also lehrne jm seine Haͤwe mit disen durchhaͤwen gantz abweisen, vnnd hinweg hawen.