Zum andern / solt du gedachte Linien gantz durch hauwé / Also schick dich mit deim Dusácke zustehn / wie obé gelernet / von dañen hauw durch die auffrecht Lini mit außgestrecktem Arm / gang durch / vñ wende dein rechte Seiten dem hauw wol nach / gegen deiner lincken / also das dein Dusácken in solchem hauw / nebé deiner lincken zu ruck fürvber lauffe / Jn dem aber dein Dusácken nebé deiner lincken zuruck durchlaufft / so ziehe vnder deß auch zugleich dein gehúltz / neben deiner lincken vbersich vm den Kopff / biß in die wacht wider zum streich / so stehst du wie das Bild zur rechten in hie vorgetruckter Figur so mit dem Búchstaben B. verzeichnet anzeigt / zugleich in dein du dein Dusácken also wie gemelt auffzeuchst zum streich / solt du mit dem hindern Fúß hernach rucken / biß zu dem forderé / auff das du wider zu solchem hauw mit dem rechten fordern Fúß ein fúrtrit habest / aller ding wie nechst gelert. Trit also dann ferner mit dem rechten Fúß furt / vnd hauw auß der Wacht widerumb geradt von oben wie vor / gantz durch die auffrecht Lini / das treib auch ein hauw drey oder vier fürsich vnd hindersich auff das du jr wol geúbt wedest. Wie du nun den Oberhauw durch die auffrecht Lini volbracht / also vnd auff solche weiß / solt du auch die andern drey / gantz durch jre gehórende Lini hauwen / Damit du aber solliches(dieweil es eim vngeúbten schwer zuthun) dester daß vernemmen mógest / will ich dir den Vnderhauw auff was weiß er gantz durch die Linien zu hauwen sey / auch heiher setzen.
Also stand mit dem lincken Fúß vor / halt dein Dusácken in hieuor gemeltem Stier / alßdañ drit vnd hauwe mit langer schneid vberzwerchs von vndé der auffsteigenden Lini nach / durch sein Gesicht / Jn solchem hauw / verwende dein Hand in der lufft / das dein Daumen gegen deiner lincken sehe / vnd dein kurtz schneid in vollendung deß hauws / auff dein lincke Achssel kome / zu dem wendt dein rechte Seyté / wie oben auch gemelt / wol dem hauw nach / gegen deiner lincken / als bald du mit solchem hauw nahet zu der lincken Achssel ankomen bist / so zucke dein gehültz behendt wider zu eim anderen streich vberssich vmb den Kopff / vnd ruck dein lincken Fúß hernach biß au dem rechten / Alßdann hauw wider mit eins zútrit deines rechten Fúß von deiner rechten von vnden schlims vbersich / durch sein Gesicht / also das du mit deinem Dusácken zu deiner lincken Achssel kompst / wie vor / von dañen erholl dich wider mit einem andern hauwe / Solches treib dann fürter ein hauw drey oder vier hindersich vnnd fürsich wie du mit vorigen halben háuwen gethan hast. Wie du nun mit den halben háuwen hieuor gelehrt bist / deines gegenparts streich auffzufangen / Also lehrne jm seine mit disen durchháuwen ganz abweisen / vnd hinweg hauwen.
