Wiktenauer logo.png

Difference between revisions of "Page:Gründtliche Beschreibung der Kunst des Fechtens (Joachim Meÿer) 1570.pdf/163"

From Wiktenauer
Jump to navigation Jump to search
(No difference)

Revision as of 04:43, 8 February 2015

This page has been proofread, but needs to be validated.

Die dritte Regel / vom anfang deß verfúrens / vnd wie man die Háuw abzucken / vnd in einander verwechsseln solle.

Wann du nun ein jede Lini gegn einander durchtreiben gelert hast / solt du auch ferner die Háuwe lernen abzucken / nemliché also:Nach dem du dich in einen stand für den Mañ nach gelegenheit geschickt hast / so trit vnd hauw mit außgestrecktem Arme / vñ langer schneide / von oben nach außweisung der auffrechten Lini zum Kopffe / vnd merck in dessen / ob er deinem hauwe mit versatzung begegnen wúlle / alßbald du solches ersehen / so laß deinen hauw nicht rúhren / oder auff seinerr versatzunge antreffen / sondern zucke deinen hauw eher denn er auff seine versatzung trifft / behendt wider zu ruck ab. Vnd hauw neben deiner lincken von Vnden eben durch die selbigen auffrechte Lini / mit streckte gewaltiglich vbersich durch. Wie das Bild in diser Figur zur rechten weiset.

Herwiderumb hauw den ersten neben deiner lincken / von vnden / gar nach biß an seine versatzung / vnd in dem es eben jetz rúhren soll / so zuck behendiglich wider zu ruck vbersich vmb deinen Kopff / vnnd hauw von oben gantz durch die auffrecht Lini / das ist durch sein Gesicht. Auff solche weiß hauw von deiner rechten gegen seiner lincken / der mittel Linien nach / biß an seine versatzung / vnd laß es auch nit rúhren / sondern in dem es eben antreffen soll / so ziehe wider ab vmd den Kopf / vnd hauwe von der andern seitten / gantz durch dieselbige mittel Lini / dises solt du gegen / vnd durch alle vier Linien treiben lernen / gleich wie auch die vorigen zwen háuwe. Solches abzucken / ist der anfang alles verfúrens.

Die vierdte Regel / wie man die Háuwe vnder einander wechsseln soll.

ZVm vierdten / ist auch notwendig vnd nutzlich / das du die Háuwe frey flügendt ab / vnd durch einander Weckßlen kónnest / welches dieweil es auff dreyerley arth vnd weise geschehen kan / will ich will ich erstlich den grunde / solches wechsseln / durch die drey Linien / Nemiich durch die zwo schlim me als die hangende vnd auffsteigende / vñ durch die vberzwerch mittel Lini anzeigen / darnach erlich Exempel hinan hencken / also. Wann du nun von deiner rechten / von oben / oder vnden schlims durch den Mann hauwest /