Page:Gründtliche Beschreibung der Kunst des Fechtens (Joachim Meÿer) 1570.pdf/165

also das du mit deiner Wehr zu deiner lincken komest / so hauw den andern bald wider von deiner lincken / durch seine rechte vberrzwerch der mittel Lini nach / durch den Mañ / hast du aber von deiner lincken durch der schlime Linien eine / es seye durch die auffsteigende oder hangende Lini gehauwen / also daß du mit dem hauwe durch komest / gegen deiner rechten / so hauw alßbald von dannen / auch durch die mittel Lini / wie vor von deiner lincken durch seine rechte / also jetz von deiner rechten durch seine lincke: Dann so offt du durch eine schlime Lini hauwest von einer seitten / also balde hauwe auch von der andern vberzwerchen / durch die mittel Lini.

Weyter merck / wann du den ersten also von deiner rechten seitten von oben schlims durch gehauwen hast / auch den Mittelhauw / von der andern hergegen / also daß du wider zu der recchten seytten komen bist / so hauw alßdann nicht wider von oben durch die schlime hangende / sonder von vndé durch die auffsteigende Lini vbersich durch / vnd von der andern auch vbersich / durch die auffsteigende Lini Demnach hauwe wider einen Mittelhauw von deiner rechten durch seine lincke / damit du ferner den Oberhauw schlims durch seine rechte hauwen kónnest / vnd stehet das Fundament aller háuwen abzuwechßlen / in den zweyen Linien / als in der schlime vnd vberzwerchen / dañ so offt du von einer seytten vberzwerch hauwest / so offt solt du von der andern schlim herwiderumb hauwen. Derhalben hawst du von diser schlims / es seye von vnder oder obé / so hauwe von der andern vberzwerch / damit du aber solch wechßlen deste besser verstehn mógest will / ich dir dreyerley nützliche Exempel hieher setzen.

Exempel mit sechß Háuwen.

ALso trit / vnd hauwe den ersten von deiner rechten / einen Zornhauw gegen seiner lincké / durch die hangende Lini / welche mit dem Buchstaben B. vnd F. verzeichnet: Den andern hauwe von deiner lincken gegn seiner rechten / durch die vberzwercch mittel Lini: Den dritten / hauwe von deiner rechten gegen seiner lincken / durch die vbersich steigende Lini starck mit einem vnderhauw vbersich durch / also das dein Dusácken nach ende des Hawes / hinder deiner Lincken Achsel abhange. Von dannen hawe ferner auch einen Vnderhauw / gewaltig Schlims vbersich durch seine Rechte. Demnach zum fünfftrn hawe einen Mittelhaw von deiner Rechten gegen seiner Lincken / durch seine vberzwerche Lini. Den sechsten aber hawe gerad von oben