Schnellhauw.
SChnellhauw / Merck so du im Bogen vor einem stehest / will er nit hauwen / so zuck vbersich in die Wacht / sam du oben hauwen woltest / thú es aber nit / sonder verwends in der lufft / vñ hauw mit langer schneid von Vnden auff / zu seim rechten Arm in eim schnall / vnd windt den Dusacken wider zu ruck gegen deiner lincken Achsel / von dannen hauw ein Wehrstreich durch sein Rechte / es sey vnderhalb oder oberhalb den Armen / durchs gesicht. Item wann einer vor dir im Bogen stehet / vnd nicht arbeiten will / so schnelle jm mit kurtzer schnnid oberhalb seim Dusacken zum Kopff / oder / so er sein Dusacken hoch in Versatzung helt / so schnell jm vnder sein versatzung zum gesicht.
Windthauw.
WIndthauw / ein gewundener Hauw / ist an jhm selber nicht anderst / dann von welcher seiten du hinein hauwest / das du gegen derselben wider herauß komest / also / wann du von deineer Lincken Oben hinein hauwest / so zuck vnnd wende den Dusacken gegen deiner Lincken vndersich wider herauß / vnnd das alles eim flug gleich / als woltestu ein stuck / einé halben Mañ gleich / auß seiner seiten hauwen / vnd gehet zu beiden seitten.
Bochhauw.
BOchhauw treib also / wañ ewer zwen voreinand in hoher Versatzung im Bogé stondt / vnd keiner vor dem andern hauwen will / sonder jhe einer auff des andern streich wartet /
