Ein gůt stuck welches auß dem Lincken vnd Rechten Stier zůsamen gefochten wirt.
JTem treib mit gewaltiger sterck / vbereck schlims vber deinen rechten Schenckel dem Mann durch sein Gesichte / ein Hauw oder drey / von Vnden oder Oben zusamen / vnnd mercke / wann du das dritte mal zu deiner lincken Achseln ankommen bist / so hauwe als dann zwen Vnderháuw / ein von deiner Lincken den andern von deiner Rechten / beide starck vbersich durch sein Gesichte / das du nach ende der zweyer Vnderháuw wider in die lincke Zornhůt kommest / von dañen hauwe mit kurtzer schneide / oder schlag mit der Fleche vnd mit außgestrecktem Arm vberzwerch durch sein Gesicht / also starck das sich nach Ende des Hauwes dein Dusacken in die Hůt des rechten Stiers verschiesse / von dannen tritt abermals mit deinem rechten Fůß ferner zu jhm mit außgestreckté Arm von oben gegen seinem Gesichte / demnach hauwe zum letsten behendiglich dem stoß nach auch von Oben durch sein Gesicht / vnd in allem tretten bleib mit deinem rechten Fůß vor.
Regel.
JTem hauwet dir einer gegen deiner Rechten(wann du also in der lincken Oberhůten einer stehest) so hauwe mit einem außtrit gegen seiner Rechten einnen gewaltigen Windthanwe / außwendig vber seinem rechten Arm zum Kopff / dañ so offt du in diser zwey er Leger eines kommest / so soltu dich befleissen / das du jhme allwegen auß seinem herkommenne Streich trettest / vnnd zugleich jhm oberhalb seinem Dusacken / mit weitem zulangen zum Kopff hauwest.
