Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/226

From Wiktenauer
Jump to navigation Jump to search
This page contains changes which are not marked for translation.

This page has been proofread, but needs to be validated.

wider zuruck gegen deiner Lincken Achsel, von dannen hauwe herwiderumb durch sein rechte Achsel, es sey under oder oberhalb des Arms durch sein gesicht, asl dann hauw kreutzhäuw, oder gerade Treibhäuw Lang von dir.

Item hauwer er aber von Oben, so versetz ubersich gegen deiner Lincken und in dem er seinen Dusacken von seinen gethonen hauw wider auffzeucht, so Hauwe dieweil behend von deiner Lincken, gegen seiner Rechten durch, es sey unden oder oberhalb seinen Dusacken, ihe noch dem er behend oder langsam auffgefahren ist, so kompstu nach ende des hauwes mit deinen Dusacken neben dein Rechte seiten, von dannen hauw behend wider uberzwerch von unden auff mit Langer schneide starck durch, also das dein Dusacken wider auff die Lincke achsel komme, von dannen hauw gerichts und lang von Oben hinein nach.

Wann einer auff dich von Oben hauwet, so merck in des er auffzeucht, so zuck dein Wehr auch auff dein Lincke achseln, Hauw also mit Langer schneid von deiner Lincken uberzwerch, gleich mit ihm hinein, zu solchem hauw trit wol gegen seiner Rechten auß, so triffestu ihn, und nimbst ihm seinen hauw hinweg durchs kreutz.

Ein gut stuck durch drey Mittelhäuw.

HAuw dein ersten Mittelhauw von deiner Rechten, oberhalb seinem gefeß durch sein gesicht, Den andern von deiner Lincken under seinem Rechten arm auch starck durch, Den dritten widerumb von deiner Rechten gegen seiner Lincken zum gesicht, so du die recht hauwest, so wirt under disen dreyen einer treffen.

Merck so du im zufechten für den Mann kommest, er aber schlecht nicht gleich, sonder wartet auch auff deine streich, so schauwe das du ihn mit geberden also lang und vil anreitzest, biß das er auffgeht und schlecht, under deß merck fleissig, als bald er auffgeht unnd herschlecht, so zucke deinen Dusacken auch umb deinen Kopff zum streich, unnd schlage mit ihm zugleich auff solche weiß hinein, also das du sein streich auff die sterck deines Dusackens empfangest, unnd das du auch zugleich in dem sein Dusacken auff den deinen bocht, ihne mit der eussersten halben schneiden auff seinen Kopff treffest, wie du solches an den zweyen kleinern Bildern in der Figur mit dem H. zwischen den grössern sehen kanst, von dannen laß behende wider umb schnappen, und stich ihn mit verkerter hand under seinem Dusacken vor sein Brust, aller ding, wie dich solches auch die kleinern Bilder zur Rechten