Page:Gründtliche Beschreibung der Kunst des Fechtens (Joachim Meÿer) 1570.pdf/25

Sonder helt auch in sich die Blóssungen / welche durch die außtheilung des Mans vñ Schwerdts muß verstanden werden / darzů denn auch das recht stehn vnd tretten gehórig / von welchem in seinem ort auch sol gehandelt werden.

Das abziehen am ende / fleußt auß dem Mittel / vnnd hat in der Practicken grossen nutz / derwegen zů ende eines jeden stucks / von darauff gehórendem Abzug / ordenlich soll bericht geschehen / vnd soll dises alles im ersten theil vom Schwerdt Fechten volricht werden / von Meisterstucken aber / vnd was zů mehrer behendigkeit zů diser Wehr dienstlich / damit diß Bůch bey den anfangenden Schülern / vnd demnach auch den mehr erfahrnen diser kunst nutzlich sein möchte / soll im andern theil weitleuffiger vnd gnugsamer bericht beschehen.

Solchen eingang aber / hat mich derwegen fúr gůt angesehen zů machen / damit diß Bůch einem jeden desto leichter zůuerstehn were / vnder sich darein wüste zůrichten / so er anfenglichen verneme / in was ordnung ich solche Ritterliche kunst wolt darthun / Will derwegen jetz im ersten Capitel von der theilung des Mans / als die am nútzlichsten ist am ersten zümelden / bericht thun / vnd wie derselbig in vier quatier außgetheilt wirdt / anzeigen.