Page:Gründtliche Beschreibung der Kunst des Fechtens (Joachim Meÿer) 1570.pdf/288

fúhre oder transforiere dein Kling ein wenig gegen der erden hanget vnder seiner klingen durch in eil gegen deiner lincken seiten / vnd schneide ihn von der selbigen sein herlauffenden haw oder stich gegen deiner Rechten (ehe er in gantz volbracht hat) ab / also das du mit solchem abschneiden wider in die rechte Vnderhůt komest / vnd solches kanstu auch thůn aus allen Legern zů beiden seiten.

Verhengen.

VErhengen ist ein solche Versatzung / da du dein gefeß mit fürsich ausgestrecktem Arm / oberhalb deinem gesicht fúhrest / also das dein kling gerichts vndersich gegen der erden hang / vnnd thregest jhm also seine stich / bisweilen auch streich / mit deiner flech zů beiden seiten ab / heist darumb Verhengen / dieweil in solcher versatzung dein kling vor deinem gesicht hangt / dasselbige zů beschútzen / vnd ob es wol auch aus allen Legern zů wegen bracht wirt / so ist es doch fúrnemlich vnd am beqúmsten aus den Legern zůr Rechten seiten zů brauchen / auff solche weiß schicke dich in die Vnderhůt zůr Rechten / sticht oder hauwet dein widerpart auff dich / so tritt mit deinem lincken fus hinder deinem Rechten aus / gegen seiner Lincken / folg behend mit deinem Rechten ferner zů jhm / in dem fahre mit deinem gefeß vbersich / vnd fúhre jhm sein klingen von deiner Rechten gegen deiner Lincken / auff der flech deiner hangenden klingen ab / wie du solches an den zweyen obern bossen zůr rechten hand in nachgetruckter Figur / mit dem Buchstaben E. verzeichnet sehen kanst.