Page:Gründtliche Beschreibung der Kunst des Fechtens (Joachim Meÿer) 1570.pdf/296

sein stich wie gemeldet von dir Abschneidest, soltu mit gesencktem leib wol uber dein fürsich gebogen Kni, dem Hauw nach zulangen, Wann dan solches geschehen ist, so stehestu wider in der rechten Underhut wie anfangs, wo er dir weiter zustechen würt, so fahr eben auff vorgelegte weiß, mit Langer schneide wider ubersich, biß in die lincke Oberhut, von dannen stich behendiglich mit einem außsprung gegen seiner Rechten lang für dir hin gegen seinem gesicht, in disem stich soltu abermals die Lange schneide so starck undersich gegen deiner Rechten wenden, und in disem Abschneiden soltu dein klingen neben deiner Rechten zum streich verwenden, das du demnach einen geschwinden hauw, zu einem Wehrstreich, schlims durch sein lincke achsel haben mögest, wann du den volbracht hast, so wirstu dein Wehr zur Lincken in der Underhut haben, von deren du als dann mit Langer schneide, wider ubersich biß in die Rechte Oberhut versetzen magst, und fürter.

Also bistu bißher gelehrt worden, wie du auß der rechten Oberhut unnd aus der lincken Underhut, undersich und ubersich gegen einander uberort, nach außweisung der schlimmen unnd hangenden Lini versetzen solt, und als dann von der lincken Underhut mit einem Wehrstreich, durch sein Rechte zur andern seiten Umbwechseln solt, in die recht Underhut, demnach von der selbigen gleichsfals wie von der andern geschehen, uberort ubersich unnd undersich versetzen, unnd nach deiner gelegenheit wider durch einen Zornhauw, oder Wehrstreich abermals umbwechßlen, auff solche weiß kanstu alwegen aus einem Leger in das ander, undersich unnd ubersich mit Langer schneid, kreutzweiß unnd gegen einander Versetzen, Abschneiden und ubersich führen.

Weiter so kanstu auch aus allen vier seiten legern mit austretten, biß in das Lang ort Absetzen auff solchen art wie volgt.