Page:Gründtliche Beschreibung der Kunst des Fechtens (Joachim Meÿer) 1570.pdf/335

gestrecktem Arm schnitst weiß von dir vndersich ab / vnnd Stich jhm behendiglich (ehe dann er sein klingen vnder der deinen herfúr bringt) vbersich zů seinem gesicht / also das du jm antreffen des stichs jm Langen ort hoch standest / vnd so er dieweil wider fertig ist / vnderhalb deinem Wehr gegen deinem Bauch her zů stechen / so behalt dein hand smapt dem Gefeß also außgestreckt vor deinem gesicht / die klingen aber laß dieweil gegen seiner Rechten vndersich sincken / vnd schlage jhm also seinen stich mit hangender klingen von deiner Lincken / gegen deiner Rechten zůr seiten auß / vnd das mit der inwendigen flachen klingen / zůgleich in solchem außschlagen trit mit deinem Lincken Fůß wol aus gegen seiner Rechten / demnach zůcke dein Gefeß vbersich gegen deiner Lincken / vnd trit in dessen mit deinem rechten Fůß auch weiter gegen seiner Rechten zůr seiten aus / Stich oder Hauwe als dann behendiglich von deiner Lincken gegen seinem gesicht / oder seinem Arm zů.

Wie du mit deiner klingen vnder der seinen durch gehen solt.

ITem merck fleissig in dem er von Oben her sticht / so fahre mit deiner klingen vnder der seinen durch / vnd fúhre jhm die mit abschneiden von deiner Lincken gegen deiner Rechten / wie du solches an dem vndern mitlern Bild in der Figur D. mercken kanst / ab / vnd Stich jhm behendiglich gegen seinem gesicht / oder nach dem du jm mit deiner Wehr durchgangen / vnd jhm die seine abgeschnitten hast / so laß dein klingen neben deiner Rechten auß fahren / vnd Hauwe jhm mit gewaltigem außtretten gegen seiner Rechten / ehe das er recht auff kompt vornen zů seinem gesicht.

Wie du auß der Vnderhůt alle deines gegenmans Háuw und Stich / von beiden seiten kreutzweiß von dir wegk hauwen vnd nach fechten solt.

WAnn du nun also in der Vnderhůt zůr Rechten stehest / so Hauwe jhm von beiden seiten alle seine Háuw vnd Stich mit Wehrstreichen / das ist mit schlimmen Zornháuwen / durch die vberort Lini von beiden seiten kreutz