Page:Gründtliche Beschreibung der Kunst des Fechtens (Joachim Meÿer) 1570.pdf/343

Drey in einander lauffende stich / durch welche du dich zu behendig exercieren kanst.

DIe treib also / schicke dich in den Pflůg zůr Lincken / vnd hab acht als bald er sein Wehr in der Eisenen porten oder in gerader Versatzung vor jhm herfúhret / so Stiche jhm auß dem Lincken Pflůg den ersten gerichts vbersich / ausserhalb hart an seiner Wehr gegen seinem gesicht / welchen stich er dir gegen seiner Rechten abwenden wirt darumb so laß jm hinein stechen (als bald du seines abwenden gewahr wirst) neben seiner Rechten seiten ab / vnd gegen deiner Lincken zůruck durchlauffen / also das dein klingen neben deiner Lincken vmbschnappen in dieselbige Oberhůt / in dem dein klingen aber also vmbschnapt / dieselbige weil trit wol gegen seiner Lincken / mit zwifachen tritten zůr seiten auß / vnd Stich jhm den andern mit solchem außtretten / auß dem lincken Ochsen innerhalb seiner Wehr gegen seiner Brust / disen stich wirt er dir auch gegen seiner Lincken versetzen wóllen / derhalben in dem du solches gewahr wirst / so wende die kurtze schneid gegen seiner klingen einwerts / vnd laß dieselbige in solchem einwerts wenden / vnder seiner klingen gegen deiner Lincken durchlauffen / vnd abermal neben deiner Lincken in den selbigen Ochsen vmbschnappen / in solchem durchlauffen vnd vmbschnappen deiner klingen / spring wol gegen seiner Rechten seiten auß / vnnd Stich jhm hiemit zům dritten auß dem lincken Ochsen / ausserhalb seinem Rechten Arm zům gesicht.

Wie du jm hinein stechen den Oberstich in ein Vnderstich verkehren solt.

ALso / wann er sein Wehr vor jhm her in gerader Versatzung fúhret / so Stiche jhm behend vnnd ohnversehens innwendig vbersich gegen seinem gesicht / also das in disem hinein stechen dein klingen hart an der deinen bleibt / auff das du jhm in solchem hinein stechen auch sein klingen auff ein seiten außtruckest / so wirt er mit seinem Gefeß / in die hóhe fahren / Darumb so bald du dessen gewahr wirst / so rucke dein Gefeß eilents vbersich / vnd laß den vorderen ort neben seinem Gefeß herumb / vndersich sincken / vnnd Stich ihm von Oben vnder seiner Wehr hinein zům Bauch.