Page:Gründtliche Beschreibung der Kunst des Fechtens (Joachim Meÿer) 1570.pdf/344

Wann er dir aber (in dem du den ersten stich hinein thůst) dein klingen gegen seiner Lincken aus truckt / so wende abermal dein Gefeß eilents vbersich / vnd volfúhre den stich wie vor.

Vom einlauffen.

IM zůfechten schicke dich in Rechten Pflůg / hauwet er von Oben auff dich / so wende dein Gefeß (in dem er herhauwet) mit ausgestrecktem Arm vbersich zwischen dir vnd jhm durch / gegen seiner Rechten achsel / so steht dein klingen vberzwerch vor deinem gesicht / vnnd fangest jhm also seinen herfliegenden hauf auff dein flache klingen auff / in solchem versetzen dieweil du jhm sein klingen noch mit deiner versatzung in der lufft auffheltest / deiselbige weil trit auch mit gebucktem Haupt vnder seiner klingen / gegen seiner Rechten seiten durch / vnd verwende dein Wehr aus der versatzung in ein stich / so triffestu ehe er sich dessen versehen hat / wie dir solches das mitler vnd eusserste Bild in der Figur G. zůr Lincken hand anzeigt / magst dich ferner mit absetzen schútzen / wiewol wann du dise stuck mit scharpffer klingen treibest / wirstu seines absatz bedórffen / Auß disem stuck werden zům ernst gewisse stich genomen / dieweil aber solches nicht in die gemeine gehórt / hab ichs bey dem bleiben lassen / auß welchem der fleissige nachdencker wol etwas nemen kan.

Wie du jhm die Wehr nemen kanst.

SChicke dich in den Pflůg zůr Lincken / Hauwet oder sticht er dir von Oben her / so wende dein Gefeß sampt der klingen vbersich / vnd fange jhm seinen hauw mit vberzwercher klingen noch in der lufft / nahet bey seinem Gefeß auff / also du in solchem versetzen dein Gefeß gegen deiner Lincken / vnd dein klingen gegen seiner Rechten nach der zwerch auß sehe / in dem du aber aufffahrest also zů versetzen / so spring mit deinem Lincken fůß wol vnder seinem streich zů jhm / vnd dieweil sein klingen mit solchem streich noch auff deiner jm treffen ligt / so greiff mit deiner Lincken verkehrten hand vnder deiner klingen durch in sein Gefeß / wende jhm das mit vmbreiben gegen seiner Rechten auß der hand / wie dir dann solches der óberste boß in hievor getruckter Figur G. auch zůr Lincken hand anzeigt / will ers nicht bald gehn lassen / so stoß jhm mit deinem Knopff auff ein gelenck.