Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/355

From Wiktenauer
Revision as of 01:58, 14 February 2015 by Michael Chidester (talk | contribs) (→‎Proofread)
(diff) ← Older revision | Latest revision (diff) | Newer revision → (diff)
Jump to navigation Jump to search
This page has been proofread, but needs to be validated.

Oder in dem du jhm also versetzest / so Stich vnder deinem Dolchen durch / aussen vber seinem Rechten arm / vber dein hand gegen seinem gesicht / wie du das an dem eussersten vnd obersten Bilde zůr Rechten hand mercken kanst / wende also mit deinem Gefeß vnder deinem Lincken Arm (auff das du dich hiemit zům streich erholest) wol vbersich / vnd Hauwe jhm von deiner Lincken / zů seinem fúrgesetzten bein / oder schlage jhm seinen herfliegenden stich mitdeinem Dolchen gegen deiner Lincken zůr seiten aus / vnd Stich jm dieweil von Oben gegen seinem gesicht / will er das mit seinem Dolchen aufffangen vnd versetzen / so zůck deinen stich neben seinem Dolchen herumb / vnd Stich jhm jhm dieweil er mit dem Dolchen nach aufffehrt / von vnden gegen seinem Bauch.

Oder schlage jhm mit deinem Dolchen / seinen herfliegenden Sticht von deiner Lincken gegen deiner Rechten aus / vnd Hauwe jhm dieselbige weil / oberhalb deinem Dolchen schlims vberort durch sein Rechte Achsel / sticht er dir aber von vnden gegen deiner Lincken / so wende jhm seinen herkommenden stich mit hangendem Dolchen von dir gegen deiner Lincken zůr seiten aus / wie dich das vnder Bild gegen der Rechten hand / in gedachter Figur lehrt / vnd Stich oder Hauwe jhm hiezwischen zůr nechsten Blóß.

Die andere Versatzung.

HAuwet oder sticht er dir aber zůr andern seiten / nemlich gegen deiner Rechten / so versetze jhm den mit deiner Wehr / vnd spring in des mit deinem Lincken Fůß zů jhm / vnd Stich jhm (dieweil du versetzest) mit deinem Dolchen zů seinem Rechten arm.

Item versetze jhm seinen hauw oder stich / den er gegen deiner Rechten herfúhret / mit deiner Wehrs klingen / in dem vnd als bald sein klingen auff die deine rúhret / so spring mit deinem Lincken fůß zů jhm / vnnd fall jhm zůgleich mit deinem Dolchen auch an sein klingen / vnd halt jhm die seine damit so lang auff / biß du ihn mit deiner Wehr oberhalb deinem Lincken arm mit einem stich geletzt hast / welches dann augenblicklich geschehen můß / oder nime andere Háuw vnd Stich fúr dich / wie du dan deren aller hand in dem hie vor gelehrten Rappier fechten gnůg sam findest / als bald du ihn mit deiner Wehr geletzt hast / so trit mit deinem Lincken fús wider zůruck / auff das du mit deinem Rechten fůß wider vor standest / vnd dich mit beyden Wehren / ferner wie anfangs schútzen mógest.

Sticht oder hauwet er dir aber vnden zů / nemlich gegen deiner Rechten / so versetze jhm solche mit deiner han