Page:Gründtliche Beschreibung der Kunst des Fechtens (Joachim Meÿer) 1570.pdf/363

oder Mantel mit deiner Lincken hand / inwendig bey deiner Lincken achseln / bey dem kragen oder vbrschlag / ziech den vom leib / vnnd wicklen den selbigen vmb den Arm / Hauwet oder Sticht er dir als dann gegen deinem gesicht oder leib her / so fang jhm (mit einem zůsprung vnder sein Wehr) sein hauw mit deinem Wehr auff / vnd in dem sein kling auff die deine jm Hauwen noch rúhret / so eyle mit deinem Lincken arm / sampt der Kappen auch an sein Wehr / vnd kanst jhm also mit deiner Kappen sein Wehr auffhalten mit nachfolgen / vnd bleiben / so lang biß du ihn nach deinem gefallen geletzt / getroffen / oder vberwunden hast.

Dises ist die beste Regel / das du jhm (wann einer auff dich Hauwet) sein streich mit deiner Wehr aufffangest / vnd in dem es noch rúhret / mit deiner Kappen an sein klingen fallest / jhm dieselbige damit auffzuhalten / vnd dieweil schauwest / wo du ihn mit hauwen oder stechen ereylen kanst. Bistu aber des vmbwicklens fertig vnd gewiß / so versetze jhm seinen hauw / mit deiner Kappen / vnnd hauwe jhm dieselbige weil / eben in dem du noch also versetzest / zů nechsten Blóß.

Ein anders.

WAnn du dein Wehr (dar zů genótigt) gezogen hast / so fasse dein Kappen oben bey dem kragen / vnnd halte die mit vndersich gehencktem Arm / neben deiner Lincken seiten / merck in dessen fleissig / als bald er herhauwet so schlage jhm dein Kappen von vberzwerch vmb sein herfliegende klingen / vnd als bald du jhm sein klingen außgeschlagen hast / so Hauwe jm oberhalb derselbigen zům Kopff / wie dir solches die kleinern bossen in hievor getruckter Figur zůr Rechten hand anzeigen.

Wie du dich mit einer Handgewehr / gegen einem Knebelspieß oder dergleichen gewehr halten solt.

DEm thů also / wann du von einem mit einem Knóbelspieß vbereylt vnd vberlauffen wurdest / so fúhre dein gewehr / nach dem du die in eil gezuckt hast / zůr Rechten in die Vnderhůt / also das du mit dem Lincken Fůß vor standest / vnd nim wahr / als bald vnd in dem er von Oben auff dich herschlecht / so springe jhm wol vnder sei