Page:Gründtliche Beschreibung der Kunst des Fechtens (Joachim Meÿer) 1570.pdf/365

Ein ander vnderlauffen.

LAsse dein Wehr zů der rechten Vnderhůt wie vor / vnd mercke in dem er eben jetz von seiner Rechten herschlecht so fahre in des mit deiner Wehr vnder seiner Stangen gegn deiner Lincken seiten durch / vnd trit zůgleich mit deinem Rechten fůß / zwischen dir vnnd jhm gegen seiner Rechten seiten auch durch / Hauwe jhm also in solchem durch tretten / von deiner Lincken eylents wider sein herkomende Stangen / starck gegen der hand die er jm herschlagen vor fúhret / dises alles / nemlich das durchgehn mit der Wehr / vnd das tretten můß behend in einem sprung zůgohn / auch must du mit gebucktem Kopff vnder seinem streich durch / eylents entweichen / so gehet dir das stuck wol an / tringe als dann gewaltig auff ihn dar / vnd laß ihn zů keinem volkomenen streich mehr komen.

Ein anders / Wie du jhm seinen Stich außschlagen solt.

F'Iehre dein Wehr (nach dem du die gezogen hast) in der Rechten Oberhůt zům streich / Sticht er dann gegen deinem vndern leib her / so zůcke dein Wehr vmb den Kopff / vnnd Hauwe jhm sein Stich von deiner Lincken mit hangenden klingen / zůr seiten gegen deiner Rechten starck auß / vnnd springe hiemit gewaltig gegen seiner Rechten hinein / Sticht er dir zům obern / das nim auß / und versetze das / wie oben gelehrt.