Page:Gründtliche Beschreibung der Kunst des Fechtens (Joachim Meÿer) 1570.pdf/366

Fechten im Dolchen.

Das vierte theil dises Buchs handlet vom Fechten im Dolchen daraus mann lehren kan / wie mann allerley dergleichen kurtze Wehren gebrauchen soll / sampt vil schónen Ring stucken so darunder begriffen.

Von der Oberhut.

IN die Oberhůt schicke dich also / fúhre deinen Dolchen hoch vor deinem gesicht / wie das grosser Bild zůr Rechten hand in diser Figur ausweißt / trit also zů jm vň bleib mit deinem rechten Fůß vor / Sticht einer auff dich her / gegen deiner Lincken / so fahre mit hangendem Dolchen von deiner Rechten gegen seinem / vnd fange jhm seine hand mit deinen Dolchen hinder seiner hand bey seinem glid auff / also das in solcher versatzung dein Dolchen knopff vbersich vnnd die klingen vnder stehe / als bald du nun mit solcher versatzung an sein glid rúhrest / so bald fahre mit deinem Dolchen (doch das du in dem allem mit der Dolchen klingen hart an seinem Arm bleibest) vnder seinem Arm durch / vnd oben wider vmb seine hand / truck dein Dolchen klinge wol zů deinem Arm / so klemestu in dester harter / Reiß im also sein hand gegé deiner Rechté seiten vndersich / Demnach fahre mit deinem Dolchen knopff inwendig an seinem rechten Arm vbersich gegen seinem gesicht oder Kin / fehret er aber deinem Dolchen nach vbersich auff / so zůcke vmb den Kopff / vnd Stich nach der zwerch inwendig gegen seinem rechten Arm zů seinem gesicht gantz durch / den letsten aber volbring in einem Riß sampt einem abtrit deines Lincken fusses / gerad von oben durch sein gesicht /