Page:Gründtliche Beschreibung der Kunst des Fechtens (Joachim Meÿer) 1570.pdf/382

der dem Dolchen / vnd in der versatzung begreyff sein Rechte hand mit deiner Lincken / vnd mit deinem rechten Arm greyff vnden durch / hinder seinem Elenbogen vmb seinen rechten Arm / vnd trit jhm vor mit deinem rechten Bein / vnd wend dich auff dein Rechte seyten kurtz vmb / vň wirff jhn vber dein recht Bein.

Item ein anders / Sticht er dir nach dem Halß / das versetz als vor / vnnd in der versatzung fahr mit deiner Lincken hand aussen vnden vmm sein rechten Arm / also das du mit deiner Lincken hand wider von vnden auff wider an dein Brust kommest / vnnd mit deiner rechten Hand greyff vnder sein Elenbogen / vnd heb also von vnden auff so brichstu jhme den Arm.

Item ein stuck vnd Bruch / Stichstu jhme zů dem Halß / vnd er will dir vmb den Arm fallen / als vorgeschrieben stehet / so zůck den stich gar wenig wenn er dich begreyfft / vnd mit deiner Lincken hand greiff bald vber sein Lincke achsel / vnd begreyff den ort am Dolchen / so hastu jhm den Lincken Arm gefangen / vnd wirff jhn also mit dem Dolchen vor dir nider / oder greyff im nach der gurgel.

Ein Bruch auff das wenn er den Dolchen also bey dem ort wil greyffen / so bald als er vber fehrt mit dem Arm / so greyff mit der Rechten hand seinen lincken Elenbogen / vnnd stoß den starck vbersich von dir / hinder trit jhm ein Fuß / so felt er auff den rucken.

Merckestu das er dir den Mittelstich versetzen will / so stich nit ferner dann an sein hand / bey derselben fahr behend vnden durch mit verkehrter hand / also das der Knopff vorgehe / vnd kom jhme also mit dem Rechten arm vnder sein Halß / vnd trit in des mit deinem Rechten bein hinder