Das fünffte vnd letste theil dises Bůchs in welchem gelehrt vnd auffs kürtzest gehandelt wirt / von dem Fechten in der Stangen / Helleparten / unnd vom langen Spieß.
DIse drei Wehr hab ich derenhalben zůsamen in ein Figur gatiert / dieweil der Spieß seiner lenge halben vň nach der perspectiva sich also oben in Figuren am besten geschickt hat / derenhalben dieweil dann ein jede Figur wie bißher auch geschehen / mit einem sondern Bůchstaben vermerckt / sol sich der fleissige Leser das nicht jrzen lassen / vnnd willalso die halbe Stangen als ein fundament aller langen Wehren / zům ersten für die hand nehmen / vnd erstlich anzeigen wie vil der Leger demnach wie du dieselbigen ins werck richten solt / lehren vnd beschreiben.
Von den Legern oder Hůten.
DEr Leger aber sein fürnemlich fünffe / nemlich die Oberhůt / gerad vbersich vor dir außgestreckt vnnd zů beiden seiten / demnach die Vnderhůt auch zů beiden seiten / ferner so hastu auch zwo Nebenhůten vnd ein Mittelhůt / letztlich die Steirhůt.
