Page:Gründtliche Beschreibung der Kunst des Fechtens (Joachim Meÿer) 1570.pdf/433

in der Stangen / also das du sie gefast habest / wie dich das Bild in der Figur zůr rechten Hand lehrt / vnd hauwe neben deiner Lincken seiten von vnden gegen seiner Rechten / mit dem Blat schlims vbersich durch / biß in di Oberhůt / sticht er hiezwischen / so Reisse jhm den mit dem vnderhauw vbersich auß / demnach Reisse mit dem Blat wider vberort gegen deiner Lincken vndersich / vnd lasse vmb den Kopff fahren / hauwe also mit einer Hand gerad vnnd lang von Oben hinein / Dises Stuck wann du das geschwindt treibest / so geht es dir wol an.

Ein anders.

BInde jhm von deiner Lincken gegen seiner Rechten / mit deinem Blat an das seinige an / vnnd rucke jhm dasselbige in einem uhnversehenen Truck von dir auß / zůcke behend wider gegen deiner Lincken vmb den Kopff / in solchem vmbzucken (nach dem du hiemit der Stangen einen Schwung gegeben hast) lasse die lincke Hand ab / vnnd hauwe also mit einer Hand / von deiner Rechten vberzwerch von vnden gegen seiner Lincken zům Kopff / alßbald strecke dein rechte offene Hand wider von dir auß / vnd ergreiffe mit derselbigen dein Hellepart (die dann noch im von vnden vbersich fahren ist) wider / hauwe demnach behendiglichen mit beiden Henden von Oben nider / mit einem außtrit gegen seinem Kopff / mit disem Hauw solt du jhm (wo er vnder des herstechen wurde) seinen Helleparten nider Dempffen / vnd dem nach behendiglichen nachstechen.

Ein Stuck auß dem Mittelhauw

JM zůfechten wann du fůr den Mann komest / so erhebe dein Helleparten in die Oberhůt / aller ding wie dich das Bild in der Figur G. zůr lincken Hand lehrt / vnnd hauwe von dannen mit beiden Henden vberzwerch gegen feiner Rechten / dem Gesicht vnd der Helleparten zů starck durch / wende demnach eilents dein Blat vbersich / vnd reisse also bald herwider von deiner Rechten gegen seiner Lincken / auch vberzwerch / vnd starck gegen seinem Gesicht / vnd der Hellepart durch / zůcke hiemit dein Hellepart gegé deiner Lincken / mit beiden Henden vmb dé Kopff / vnd hauwe von oben nider gegen seinem lincken Arm den er vor führet / vnd dem Gesicht zů durch / stiche im letstlichen gerad seinem Gesicht zů / nach / Mit disen zweyen vberzwerchen Mittelhäuwen / reissestu im sein Helleparten von einer Seiten zůr andern auß / vnd zwingest jhn also / das er sich muß engsten / wie er sich mit seiner Helleparten in gerader stercke erhalte / derenhalben kanstu in wol (dieweil er sich also bemühet zůerhalten) mit dem Oberhauw ereilen.