Wiktenauer logo.png

Difference between revisions of "Page:Gründtliche Beschreibung der Kunst des Fechtens (Joachim Meÿer) 1570.pdf/445"

From Wiktenauer
Jump to navigation Jump to search
(No difference)

Revision as of 04:38, 14 February 2015

This page has been proofread, but needs to be validated.

Stoß von vnden.

WAnn du nun deinen Spieß in der Vnderhůt hast / so gibe demselbigen vornen abermal einen schwung / vnnd in dem selbigen schwung stosse mit beiden henden fúrsich auff / gegen seinem gesicht / als bald deine Arm durch solches gegen seinem gesicht stossen / auff das eusserste gestreckt seind / so zůcke denselbigen mit wider auffgerichtem leib (ehe dann er den schwanz vndersich zůfallen bekommet) wider hindersich zů dir auff die Lincke achsel / ind die Oberhůt.

Wann du diese zwen stich zůsampt dem fliegenden recht machen vnd treiben kanst / so werden dir die andern alle zů Fechten dester leichter werden / Nun will ich ferner ein Leger nach dem andern / die stuck darauß anzuzeigen vnd lehren fúrnemen / Dieweil aber von der ersten Oberhůt / hernach bey den Brúchen / auff die Leger fúglicher gesagt wirt / will ich mit der andern Oberhůt meinen anhab nemen / auß welcher ficht also.

Fechten auß der Oberhůt.

SO vil nun die stuck vnd das Fechten im Spieß belanget / will ich dich zů vorderst ermant vnd erinnert haben / das du fleissig achtung geben wóllest / auff die Vor vnd Nachstóß / wie ich dir dann alle stuck (wo es nótig sein wirdt) in dreyerley weg zů verzichten / anzeigen vnd lehren wil. vnd zům ersten / wann du in der oberhůt / also / das du dein Spieß auf der Rechten achseln ligen hast / mit deinem Lincken fůß vorstehest / vnd er dein gegenfechter stoßt gegen deiner Lincken her / so trit mit deinem Rechten sprungsweiß wol gegen seiner Lincken / aus seinem stoß / stoß also zůgleich mit jhm hinein / auch lasse im hinein stossen / die Lincke hand vom Spieß ab / vnnd wende hiemit dein Rechte seiten deinem stoß wol nach / wann du nun also behendiglichen / außgesprungen / auch im hinein stossen dein Recte hand gegen deiner Lincken vbersich gewendet / vnd den Rechten arm dapffer außgestreckt hast / so fehlet er / vnd triffestu / nach dem du dich nun also verstossen / so rucke als bald den hindern ort mit der Rechten hand wider vbersich zů dir / in dem du aber deinen Spieß also zů dier ruckest / so trit mit dem Rechten Fůß wider zůruck / vnd dieselbige weil greiff auch mit der Lincken hand wider an dein Spieß / mit der Rechten hand winde im mit gewalt vndersich so schwinget sich dein Spieß vornen wider vbersich / vnd bringest denselbigen also wider in dein gewalt.