Regel.
ALs offt du einem (der bald vnd leichtlich zům stoß zů bewegen ist) mit dem eussern theil deines Spieses vber die mitte des seinen ahngebunden hast / so kanstu jhm gegen welche seiten du wilt / mit dem hindern theil in einem abtrit durchwinden / vnd jhm durch wenden vnd austretten mit demselbigen vberisch fahren / damit du jhm seinen Spieß gegen der seiten von welcher du durch gewunden hast / nicht allein abtragest / sonder erholest dich auch hiemit an zůsetzen vnd zůstossen nach deinem gefallen / zů solchem durchwinden gehört ein sonderliche bescheidenheit / auch das du des fúhlens gewiß seyest.
Ein Bruch.
BEgegnet die einer in der Oberhůt zům stoß / also das er sein Spieß auff seiner Lincken achsel ligen hat / so stelle dich in den Wechsel zůr Lincken / das ist die Lincke Vnderhůt / von dannen schlage jhm mit dem deinen starck wider sein Spieß / so nimstu jhm denselbigen von der achsel / ehe er sich dann vom schlag wider erholt / so stoß der nechsten Blóß zů. Hergegen wann dir einer deinen Spieß von deiner Lincken achsel wolt ausschlagen / so wechsel eben in dem er herschlecht / vnder seinem Spieß durch / auff das er mit dem schlag verfehle / vnd stosse jhm dieweil er nach also im verfahren ist zůr Blóß / Wilt du einem seinen Spieß wie oben gelehrt ausschlagen / vnnd wirst gewahr das er dir durchwechseln will / so dich an sam merckestu es nicht / vnd schlage gleichwol mit ernsthafften geberden gegen seinem Spieß / in solchem schlag aber behalte deinen Spieß gleichwol in voller gewalt / damit du eben in dem er durchgeht / mit einem austrit zů stossen bereit seyest / oder auch von der andern seiten disen schlag entgegen ausnemen kónnest / vnd als dann erst volkomen nachstossest.
Ein ander Bruch.
FIndestu deinen gegenfechter in der Nebenhuten eine / so stelle dich sam stossestu ernstlich der Blósse zů / in dem er aber vbersich aufffehrt / deinem stos zů begegnen / so zůcke den deinen wider an dich / vnd Wechsel hiermit vnder seinem Spies durch / stos also auff der andern seiten hinein.