Page:Gründtliche Beschreibung der Kunst des Fechtens (Joachim Meÿer) 1570.pdf/55

Und steht zwar die ganze Handtarbeit vornemlich im Binden oder bleiben / Nachreisen / Schneiden / Umbschlagen / Umblauffen / Verfúren / Verfliigen / Absetzen / Versetzen / Zůcken / Doplieren / Verkehren / Schnappen / Felen / Zirckeln / Rinden / Winden / Durchwinden / Wechseln / Durchwechseln / Abschneiden / Hendtrucken / Vorschieben / Hengen / Außreissen / Sperren / Verstellen / Vbergreiffen / Einlauffen / rc.

Anbinden / Bleiben / Fülen.

HEist wann die Schwerdter an einander Rüren / Bleiben ist zweyerley / Erstlich wañ die Schwerdter an einander gehalten / zůsehen was der Mann will fechten / vnnd wo er seinen gegenman anzůgreiffen in willens. Darnach zům andern / welches mit streichen geschicht / wenn du dich stellest / als ob du zůckest einen streich zůerholen / vnd nur schlechts widerumb vmbschnelst / vnd mit kurtzer schneid wider dahinein kompst / dahin du zůuor mit Langerschneid gehauwen. Hie merck das wort fúlen welches soviel heist / als brüffen oder empfinden / damit du gewahr werden magst / ob er mit seinem Band hert oder weich an deinem Schwerdt ist / etc.

Nachreisen.

DIß ist ein sonder gůt Handtarbeit / vnd darin wol geübt vnd das wol weiß zů brauchen / mag billich ein Meister gelobt werden / vnd helt sich mit dem Nachreisen also / Wann du (so dein gegenfechter entweders mit seinem Wehr zů hoch vber oder vndersich / oder zů weit neben aus Hauwet) jhm zůr Blósse nacheilest / vnnd also sein Hauw zůuolfüren hinderst / welches denn fúglich kann vnd mag gegen die gebraucht werden / so mit ihren hauwen weit schweiffig vmb sich fechten / solches damit du es desto baß verstehen mógest / will ich dirs mit disem Exempel erkleren.

Wann einer gegen dir Fechtet / so nim war in welchem theil er sein Schwerdt fúhret / fúrt ers dann im rechten Ochsen / das ist im rechten Obern quatier / so soltu als bald vnnd in dem er sein Schwerdt von dannen auff die ander seiten zů Wechseln abnimpt / oder nur zům streich auffzeucht / daselbs behendiglich vnd mit list hinein Hau=