Page:Gründtliche Beschreibung der Kunst des Fechtens (Joachim Meÿer) 1570.pdf/79

werck richten / nach deinem gefallen vnd gelegenheit / weiter so lehre auch dein klingen in voller arbeit / erstlich mit Langer dann auch mit halber schneid / oder auch mit der flech / gegen seiner seiten zůr obern vnd vndern Blósse / in vollem flug behendiglichen zůsamen führen / also.

Im ersten angriff hauw ein Langen Oberhauw zů seinem Lincken ohr / in dem es glützt / so zůck beide hend vbersich / das dein Knopff vnder deinem Rechten arm im vbersich fahren durch gestossen werdt / vnnd hauwe behend mit Langer schneiden von Vnden auch zů seiner Lincken / trit in des mit deinem Lincken fus hinder deinen Rechten zů jhm / vnd komm mit deinem Hefft in solchem hauwen hoch vber deinem Haupt / Herwiderumb so hauwe den ersten einen Vnderhauw / mit einem zůtrit deines rechten Fůß / zů seiner vndern Blós mit Langer schneid / zůck behendt neben deiner Rechten wider vbersich / vnnd hauwe den andern von Oben auch zů seiner Lincken mit einem abtritt deines lincken Fus / hinder deinem Rechten zů jhm wie vor / auff das du hinder deiner kling verdeckt standest.

Item zuck mit halber schneid von dem Rechten ein hohen streich zů seiner Lincken / aber in der lufft verschrenck dein hend / vnd schlag mit halber schneide zů seinem lincken ohr / wie du solches an den zweyen obern Bilder zůr Lincken in der Figur so mit dem C. verzeichnet sehen kanst / zůck deine hende also kreutzweiß wider vbersich / vnnd schlag mit einer zwirch wider von Vnden zů seinem lincken Ohr / also auch herwiderumb Hauw die zwirch von Vnden zů seiner Lincken mit einem zůtrit / zůck behendt neben deiner Rechten vbersich / vnnd stoß in solchem auffzucken dein Knopff vnder dein rechten Arm durch / vnd schnell also mit geschrenckten henden wider von deiner Rechten Oben hinein zů seiner Lincken / auff diese weise schlag es auch mit der flech Vnden vnd Oben auff einer seiten zůsamen / das gehet zů beiden seiten / vnd merck wann du zůr Rechten vndern Blóß schlechst / es sey flech / lang oder kurtz / so kommen dein hend kreutzweiß / aber wann du