Page:Gründtliche Beschreibung der Kunst des Fechtens (Joachim Meÿer) 1570.pdf/86

Hauwe mit Langer schneide von Unden gegen seinem Lincken arm, so stehestu wie das Bild zur Lincken an den kleinern obern bossen gegen der Rechten handt, in der Figur G. anzeigt, hie mercke wann dir im abtretten ein solcher Underhauw nach deiner Lincken undern Blösse gehauwen würde, so trit mit dem Lincken fuß zu ihm, unnd fall im mit geschrenckten henden und kurtzer schneide auff sein Schwerdt, steck ihm also den Underhauw wie solchs an dem andern Bild in obgedachten bossen gegen der Rechten handt zu sehen, Unnd merck weiter, in dem er als dann sein Schwerdt wider zu ihm ubersich zeucht, so rucke dein Schwerdt also mit kreutzigten henden vollen gegen deiner Lincken, und in dem er wider herschlecht, so nimme ihm denselbigen herfliegenden Hauw mit deiner auswendiger flech, von deiner Lincken gegen seiner Rechten, überzwerch starck aus, also das dein Schwerdt oberhalb dem Kopff in vollem flug wider umbfliege, und das sich deine hend in der lufft wider ubereinander schrencken dieweil aber dein Schwerdt also Oben umbfleuget, so trit wol gegen seiner Rechten, bleib aber gleichwol mit den henden hoch, und laß die halb schneide durch ein Zürck neben seinem Rechten or (doch das dieselbige treffen oder anschürpffe) ablauffen, Hauwe als dann mit einem abtrit lang nach, Diß stuck hab ich darumb so eigentlich beschriben dieweil sonst vil guter stuck hieraus genommen und gefochten können werden, derhalben magstu es nich allein wol lernen, sonder dem auch ferner leissig nach dencken. Wie ich dir dan auff dise art noch ein stuck mit einem andern anfang setzen wil, also.

Ein anders.

IM zufechten so du in Tag oder Oberhut kommest, so laß die klingen vor dir undersich sincken wie vor, gegen deiner Lincken seiten, und zuck umb dein Kopff, trit unnd Hauw einen uberzwerchen Mittelhauw, mit Langer schneid gegen seiner Lincken, zu seinem halß oder schlaff, als bald er riert, so zuck wider umb den Kopff, und Hauw den andern auch ein Mittelhauw uberzwerch von deiner Lincken gegen seiner Rechten, auch dem halß zu, so bald es glützt so hauw den dritten ein hohen streich mit Langer schneid gerad von Oben, Dise drey häuw aber sollen in einem flug bhendt auff einander gohn, Mag dir denn mehr blatz werden so erhebe dein Knopff gegen deiner Lincken ubersich, zuck also umb den Kopff, und nim mit der flech oder kurtzer schneid, neben deiner Lincken von unden durch sein Rechte, gegen deiner Rechten in einem riss ubersich aus, das dein kling in den lufft wider umbflie=