Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/192

From Wiktenauer
Revision as of 01:07, 11 February 2015 by Michael Chidester (talk | contribs) (→‎Proofread)
(diff) ← Older revision | Latest revision (diff) | Newer revision → (diff)
Jump to navigation Jump to search
This page has been proofread, but needs to be validated.

Wie du auß der Wacht fechten solt / so dein gegenfechter zu erst nicht hauwen will / Das erts stuck auß dem Fehler.

MErck / so dein gegenpart nicht hauwen will / sondern stellet sich ein Versatzung für dich / so tritt mit deinem rechten Fůß gegen seiner Rechten vmb / hauwe den ersten von Oben außwendig zu seinem rechten Arm / das muß er wehren / als bald du dañ gewahr wirst / das er mit seinem Dusácken deinem Hauw entgegen fehret zůuersetzen / so laß deinen Hauw nicht antreffen noch rieren / sondern laß denn in dem er auffehret / fehl fürúber ablauffen / vnd des tritt behend wider herumb gegen seiner Lincken / vnd hauwe jhm abermals vornen durch sein Gesicht.

Ein stuck vnd Exempel wie du dein gegenpart anreißen solt / auff das er vbersich fahr / damit du jhm den rechten Arm letzen mógest.

EIn anders / Hauwe den ersten von Oben / gerad gegen seiner Scheitel / vnd in dem dein Hauw von Oben herflugt / so verwende in der Lufft die kurtz schneide außwerts gegen jhm / als woltestu mit derselben antreffen / vnd merck aber / in dem er auffehret deinen Hauw zu empfangé / als bald zuck vngertroffen wider ab / zu ruck vmb den Kopff / vnd hauwe mit der Fleche außwendig von deiner Lincken / vberzwerch gegen seinem rechten Arm / starck durch / vnd das soll geschehen / in dem er mit seinem Hauw herab fellet / als dann volge mit kreutzháuwen nach / Dises ist ein geschwindt Fehl stuck / dann mit dem das du die kurtz schneid gegen jhm wendest / erholest du dich eben damit / auff das du den Mittel streich desto geschwinder vnd stercker volfúren kónnest / dann eben in dem er auffehret mit seinem Arm / fleuget dein schlag vberzwerch der vnd trifft.