Ein anders.
WAnn du also im zůfechten in die Zornhůt komest / vnnd wirst alda gewar das dein widerpart zum ersten nicht hauwen will / so fúhre mit einem zutritt deines rechten Fůsses einen gewaltigen hohen Streich gegen seinem Kopffe / vnder des merck fleissig bald er mit seinem Dusacken auffehret in den Bogen zůuersetzen / so lasse deiné Hauw auff seiner Versatzung nicht antreffen / sonder zucke deinen Dusacken wider zu ruck vbersich gegen dir vmb / vnnd stoß jn mit deinem vordern Ort vnderhalb seinem Dusacken zu seiner Brust (wie solches die obern kleinen Bilder in der Figur / so mit dem Buchstaben K. verzeichnet / anzeigen) von dir / so du wilt magstu auch den ersten von oben starck antreffen / vnd demnach gleichwol deinen Dusacken in der lufft vmbschnappen lassen / vnd jn vor dir Brust stossen / als bald er aber deinen stoß nach herab fellet / so hauwe behend Oberhalb seinem gehúltz vberzwerch durch sein Gesichte.
Ein gůter angriff auß dem Zornhauw / mit vier Háuwen.
MErcke / wañ du im zůfechten in die Zornhůt komest / als bald di jn erlangen kanst / so erhebe dein Hand auß der rechten Achsel / vnd kehre Jndes die spitz am Dusacken gegen seinem Gesicht / trauwe jm also zu stechen / zucke aber dein Dusacken behend wider an dich vmb deinen Kopffe / vnd hauwe den ersten Vnderhalb seines Dusackens vbersich durch sein Gesichte / den anderen hauwe von deiner Rechté vberzwerch auch durch sein Gesichte / Deßgleichen hauwe den dritté schlims von Oben wider gegen seiner Lincken / abermal durch sein Gesichte / Den vierdten aber / hauwe als dann von deiner Lincken schlims gegen seinem rechten Arm durch / vnnd mercke auch wie manchen Hauwe du von einer seiten hauwest / so manchen trit soltu auch mit dein rechten Fůß gegen derselbigé seiten / deinen Háuwen nach zu jm tretten / dann du solt in disen stucken zum tretten / alwegen mit deinem rechten Fůß vor bleiben.
