du werdest solches in gemelter ordnung beschrieben woll verstehn vnd dir nutz machen kónnen.
Von der theilung des Manns / vnd der Wehr / vnd von jhrem gebrauch.
Cap. 2.
OBwol bisher von der theilung des Manns so vil gehandelt / also das sich ein jeder auch in dieser Wehr leichtlich darnach richten kóndte / so hat es mich doch fúr notwendig angesehé / von der selbigé nach gelegenheit des Rappiers / dieweil solches jm gebrauch von andern teutschen Wehren vnterscheiden / alhie weitleuffiger auff solche weiß zů handlen / damit du nachgesetzte Háuw gegen des Manns leib hoch oder nider / mit mehrem verstand dester sicherer fúhren lernen kóndest / vnd helt sich mit der theilung also / der Mann wirt gleichfals wie hievor mit einer auffrechten Lini in Linck vnd Recht vnterscheiden / derselbigen Lini aber werden noch zwo andere gleiche auffrechten Lini zůgesellet / mit welchen beide die Rechte vnd Lincke achsel an den seiten herab durch schnitten werden / zům andern so wirt er auch mit dreyen Schlimen hangenden Lini vbereck in vier theil abgeteilt vnd vnderscheiden / also das die erste Lini anhebt auf seiner lincken Achsel hart am Hals / streicht fernern vber das obertheil seiner Brust / vnd endet sich vnder seinem Rechten arm / Die ander hebt an oberhalb seiner Lincken hüfft / vnd durchstreicht Schlimms seinen Bauch / endet sich demnach am anfang seines rechten Schenckels / Die dritte aber hebet an in der dicke seines Lincken schenckels / vnd endet sich auff der andern seiten bey seinem lincken Knie / wann du nun disen zůgegen von der andern seiten auch drey Lini vbereck / schlims durch den Mann auff jetz gemelte weiß herzeuchst / so finden sich kreuz auff solche form wie
