Pflůg.
DEr Pflůg ist an vnselber nicht anders dann ein vnderstich / aber zů einem Láger / brauch den also / stand mit dem rechten fůß / wie bißher vor / halt dein wehr mit oberzwerchem Kreitz vnderdhalb für deim rechten Knie / das jm halten des wehrs dein daumen vber das kreitz heraus auff der fleche der klingen lige / welche flech dann vbersich gegen dir / die ander vndersich von dir gegen der erden gekert stehn solle. zů solchem stand / soltu mit den fússen weit von einander / vnd mit dem vordern Knie / wol fürsich gebogen stehen / auff das der leib dem wehr nach wol fürsich darüber hang / auch soll die spiz fürsich wol gegen des Manns bauch außgestreckt werden / solches Láger wirt auch zů beiden seiten / nemlich zůr Rechten vnd Lincken / wie die eysen Porten ins werck gericht.
Lang Ort.
DAs Lang ort jm Rapier ist das End aller stich / die do lang von dir beschehen / dann alle stich welche sich jm antreffen nicht jm langen ort enden / seind zů kurz / verstand fliegende stich / Was aber belanget verkertte / oder sonst andere abgekürzte stich / die können wol ausser dem Langen ort vollbracht werden / doch so fern / das du bald wider von solchen in das Lange ort verwendest / Dises láger wirt auch dreymal versezt / nit nach der zwerch zůr seiten auß / sonder nach der lenge des auffrechten Manns / nemlich das erst Lang ort erstrecket sich gegen seim gesicht / das ander gegen seinem gürtel / das dritte gegen seinem bauch oder gemecht. Zů solchem Langen ort in gemein schicke dich also / stand mit dem rechten fůß vor wie allwegen / halt dein wehr mit ausgestrecktem arm zům lengsten gegen deß Mans gesicht / also das allwegen dein Achsel dem ort / zů welchem du gestochen / in gleicher hóhe stand / wann du nuhn deine stich gegen seim gesicht fürest / so darffestu nicht zů weit tretten / sondern ist genůg / wann du allein so sehr trettest / das sich dein oberer leib wol dem stich nach vberhencke / auff das du mit deiner Achsel / nicht zů nider kommest / Wann du aber zům gürtel oder noch niderer stechen wilt / so můstu mit den fússen also weit tretté auff das dein Achsel dem ort dahin du gestochen hast gleich nider stand / aber hievon findestu hernach weittern bericht.
