damit du solches dester baß verstehn mógest / wil ich dir etlliche Exempel / nicht das es eben also sein múste / sonder zůr anleytung in bessere stuck / setzen / nemlich.
Wiltu nun einen mit geberden verfúhren so gebrauch dich ongefehrlich nachgesetzter Ceremonien also / wann du einen findest in der Vnderhůt zůr Rechten / so schicke dich in die Eisenport / vnd stell dich mit geberden sam du ernstlich zů seinem gesicht stechen wóllest / zů solchen geberden erhebe dein rechten fůß / vnd behalt dein gesicht steiff auff sein gesicht / vnnd fúhre jhm also mit beweglichem Arm / vnd zůgetruckten henden / mit gerimpffter naß vnd auffgehebtem fůß die spitz gegen seinem gesicht / als woltestu ernstlich stechen / vñ im hinein stechen wende die lange schneid gegen deiner lincken vbersich / erschreck ihn also mit dem stich das er gehlingen aufffehrt den zůversetzen / so laß dein stich (in dem er aufffehrt) vmb dein Kopff verfahren / vnd Hauw jm mit gebucktem leib außwendig zů seinem rechten Schenckel / mit einem weiten zůtrit / wach behend auff mit Wehrstreichen / dir zům schutz.
Item schicke dich in die Eisenporten wie vor / vnd stell dich mit anschicklichen geberden sam du jm zům fůß hauwen woltest / vnd das auff solche weiß / Im zůfechten sihe jhm mit ernsthafften auffgethonen augen steiff auff sein fúrgesetzten fus / in des erhebe dein Wehr / vnnd bucke dein leib mit auffgehebtem fus / sam du alben zů mit einem zůtrit vnden hauwen wóllest / aber in dem du dein fus jm zůtretten nider setzest / so stiche von dem ort dahin du dein Wehr auffgehaben hast / fúr dich hinein zům gesicht / in solchem stich behalt dein gesicht sampt den geberden steiff auff seinem fůß / so merckt er den stich nicht biß das er geschehen ist / dann das vbersich heben deines Wehrs zům Hauw ist dir ein erholung zům stich / vnd endet sich der trit vnd stich mit einander zůgleich / vnd dise alle soltu gegen die gebrauchen vnd lernen / welche so steiff in jhrer versatzung ohn alle arbeit stond zů warten / auff dein verhauwen oder stechen / dise můstu also auffbringen / vnd auß irem vortheil reitzen / dieweil du jhm nicht also ohn vortheill darffest angreiffen / dann du můßt sorgen das er dich in deinem eigenen stuck vberlang oder fange / derhalben můstu schauwen wie du jhn auß seinem
