Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/285

From Wiktenauer
Revision as of 02:25, 12 February 2015 by Michael Chidester (talk | contribs) (→‎Proofread)
(diff) ← Older revision | Latest revision (diff) | Newer revision → (diff)
Jump to navigation Jump to search
This page has been proofread, but needs to be validated.

Nim den Zornhauw das ist der Wehrstreich vor dich / vnd schauw ob er sein wehr ober oder vnderhalb des gürtels fúrt / helt er sein wehr oberhalb des gürtels / so Hauw den ersten vnderhalb seiner wehr durch die vnder Lini von deiner Rechten / den andern hauw auch von deiner Rechten durch der obern Linien eine / den driten Hauw durch die ober oder vnder Linie nach / wo du ihn bloß findest.

Auch wirt diser proceß nicht alwegen gehalten / dann du kanst wol Reitzen vnnd treffen / vnd zům letstem nemen / dieweil aber die erfahrung solche stuck (welche sich allein durch tegliche vebung lernen lassen) den mehrertheil můß verstendigen / will ichs allein bey disem Exempel bleiben lassen / Nemlich findest du einen in der vnderhuten eine / so Hauwe jm zůfechten ein Mittelhauw jhm vnversehens durch sein gesicht von deiner Rechten / mit disem hauw machstu das er behend vbersich fehrt / vñ damit wirt er vnden bloß / Derhalben hauwe dé andern behend von deiner Lincken durch sein fúß ehe er des inné wirt / das ist der Treffer / auff solches wirt er behend sein vnd dir zůeilen / darumb Hauwe den dritten ein Wehrstreich von deiner Rechten / damit nimstu jhm sein herfliegende klingen aus / das ist dann der Nemer / dann die zwen Mittelhauw sollen behend auff einander gohn / auff das dein anderer hauw trifft / ehe er recht auffehrt den ersten zůversetzen / damit der drit erst der Nemer wirt.

Vom versetzen vnd wie vilerley deren jm Rappier sondenlich fúr andern Wehren gebraucht werden.

DEr Versatzung werdé hie sibenerley art gefundé / mit namen Absetzen / Abschneiden / Druchgehn / Dempffen / Verhengen / Sperren / auß oder abfúhren mit auffrechter vnd mit hangen=