Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/357

From Wiktenauer
Revision as of 01:59, 14 February 2015 by Michael Chidester (talk | contribs) (→‎Proofread)
(diff) ← Older revision | Latest revision (diff) | Newer revision → (diff)
Jump to navigation Jump to search
This page has been proofread, but needs to be validated.

Exempel.

IM zůfechten wann du deine beiden Wehren nach oben fúrgemalter gestalt / mit ein wenig vndersich gesenckt vnd außgestrecktem Armen fúr dir her fúhrest / so Hauwe jhm eylents ehe dann er sich des versehen het / mit einem noch fernern zůsprung deines Rechten fusses / gerad von Oben nider / schnits weiß in einem zůg durch sein gesicht / hie zwischen dieweil du also herab hauwest / so fahre mit deinem Dolchen vbersich fúr dein gesicht / mit disem Hauw reitzestu ihn / das er ohn zweiffel der Blósse behendiglich es sey mit Hauwen oder stechen zů eylen wirdt / Derhalben als bald er her Sticht oder Hauwet / so fahre mit Langer schneide / vnd vberzwercher klingen ausserhalb deinem Dolchen vbersich / mit welchem vbersich fahren / du jhme seine herfliegende klingen vbersich ausschlagen solt / demnach dieweil sein klingen noch auff die deine rúhret / mit deinem Lincken Fůß etwas gegen seiner Rechten seiten zů jhm thretten / vnd hiemit behendt vnder deinem Dolchen durch / ausserhalb seinem Rechten Arm gegen seinem gesicht stechen / in solchem hinein stechen / wende dein Gefeß oder Lange schneide wol vbersich gegen deiner Lincken / vnd Hauwe jhm als dann dieweil er den stich abtragen vnd versetzen will / außwendig zů seinem fúrgesetzten Rechten bein / vnd bewahr dich in dessen fleissig mit ausgestrecktem Dolchen / wann du nun durch solchen hauw in die Rechte Vnderhůt mit deiner Wehr ankomen bist / so fahre von derselbigen / vberzwerchem Wehr ausserhalb vor deinem Dolchen / behend wider vbersich / auff das du deine beyde klingen mit außgestreckten Armen kreutzweiß vor dein gesicht bekomest / zů dem / dieweil du mit deiner klingen also auß der Vnderhůt vbersich farest / so trit mit deinem Lincken fůß wider zů ruck.

Wie ich dich nun disen Oberhauw jm Vor ihn damit auff zůbringen / hab lernen hauwen / also soltu auch die andern drey / nemlich den schlimen vberzwerchen / oder den von vnden von deiner Rechten / gegen seiner Lincken Hauwen lernen / vnd das hoch oder nider gegen seinem leib durch / an welchem glid du ihn am besten trauwest zů erlangen / vnd dieweil du deren gedachten Háuw einen gegen seinem leib durch hauwest / dieselbige weil fahr auch gleichfals wie vor dich zů beschútzen / mit deinem Dolchen auff / so bald du nun deren háuw einen gegen seiner Lincken durchgehauwen hast / so fahre abermals mit deiner Wehr ausserhalb deinem Dolchen / seine herfliegenden klingen abzuwenden / vbersich wie oben / vnd volfúre als dann den stich sampt dem Fůßhauw / vnd ende solches wie oben / oder nach gelegenheit.